SPAK kërkoi edhe me tre muaj pezullimin e ish-numrit dy të OFL-së, Artan Shkëmbit. Kërkesa është miratuar nga Gjykata e Posaçme ditën e sotme, ndërkohë sipas SPAK vijojnë hetimet në lidhje me akuzën ndaj Shkëmbit.
Shkëmbi është pezulluar nga detyra si i akuzuar për nxjerrje sekreti dhe korrupsion.
Referuar hetimeve, ai u pezullua nga detyra pas dekonspirimit të operacionit sekret në të cilin ishin përfshirë edhe autoritete gjermane.
Autoritetet kishin kërkuar informacion në lidhje me dy persona të cilët akuzoheshin se kishin kryer veprimtari kriminale, por që sipas tyre në lidhje me këtë kërkesë ishte vënë në dijeni vetë grupi kriminal.
Sipas gjermanëve, ishte vetë Shkëmbi ai që dekonspiroi informacionin duke vënë në dijeni Aleksandër Prronin dhe Klaudio Vukajn përmes një platforme chati të kriptuar se po hetoheshin nga Gjermania.
Ai u pezullua nga detyra më 28 shtator, ndërsa mbi të rëndojnë akuzat “Shpërdorim detyre” dhe “Nxjerrje sekreti”.
