Ministria e Jashtme shqiptare njoftoi sot vendimin për dëbimin e diplomatit rus Alexey Krivosheev, sekretar i dytë i Ambasadës së Federatës Ruse në Tiranë, me argumentin se ka shkelur rregullat anti-Covid në mënyrë të vazhdueshme. Ministria e Jashtme sqaron se ka kontaktuar me ambasadorin rus, por në kushtet kur s´ka pasur asnjë reflektim, është vendosur dëbimi i tij nga Shqipëria, duke i lënë një afat 72 orësh.
Por a është kjo arsyeja e vërtetë për marrjen e një vendimi ekstrem?
Rasti në fjalë, pra denoncimet se një diplomat sfidonte rregullat anti-Covid të vendosura nga Komiteti Teknik, raportohej prej disa muajsh. Në fakt shkelja e rregullave është denoncuar edhe për shumë nga zyrtarët e Rilindjes, përfshi edhe ata të Komitetit Teknik, që me një logjikë të thjeshtë, duhet të largohen nga detyra, për shkeljet e tyre.
Jo më larg se dje, në një prej takimeve organizative të PS-së, u shfaq Mira Rakacolli, zv.ministre e Shëndetësisë dhe drejtuese e Komitetit Teknik të ekspertëve. Ajo ishte pjesë e një mbledhjeje partie, në një sallë të mbyllur, ku numri kalonte shifrën 10 persona, aq sa përcaktohet në rregullat anti-Covid. E vetmja masë që u morr ishte fshirja e fotos nga faqja e deputetit Ervin Bushati, ndërsa Rakacolli sot u shfaq në një mbledhje të Komitetit Teknik duke dhënë arsyet sepse mësimi duhet të vijojë online për arsimin universitar.
Pra duket se arsyeja e dëbimit të diplomatit rus duket mv shumë si një justifikim mbi shkakun e marrjes së vendimit.
Nëse kthehemi pak në kohë, vetëm 3 javë më parë, Kryeministri Edi Rama u përfshi në një debat me Ambasadën ruse në Tiranë lidhur me vaksinat.
Në datë 28 dhjetor, ambasada ruse në Tiranë përmes një postimi në rrjetin social i ofroi kryeministrit Edi Rama vaksinën e saj “Sputnik V” nëse Tirana zyrtare do të ishte e gatshme ta pranonte.
Por reagimi i kryeministrit Edi Rama ishte i menjëhershëm, duke e cilësuar si provokim qesharak. Kreu i qeverisë shqiptare i kërkoi ambasadës ruse që të kërkonte falje për veprimin. Përgjigja nga selia diplomatike ruse në Tiranë nuk mungoi.
“Na vjen keq që vullneti i mirë i Rusisë, i shprehur publikisht, interpretohet si veprime provokuese”, thuhej në përgjigjen që Ambasada ruse në Tiranë i drejtonte Kryeministrit, pas reagimit të tij.
Dëbimi i një diplomati për shkelje të rregullave anti-covid-19 nuk ka ndodhur asnjëherë më parë në asnjë vend të botës dhe duket se Shqipëria është precedenti i parë.
