Kryetari i PD-së, Lulzim Basha, tha se kjo qeveri i ka ditët e numëruara, duke e cilësuar këtë një lajm të mirë për shqiptarët.
Basha u shpreh se ka pasur komunikime online me përfaqësues të BE, ndërsa tha se falenderon Bashkimin Europian për ndihmën që i ka dhënë Shqipërisë.
Kreu demokrat u shpreh se për dështimet, Edi Rama nuk mund të fajësojë Bashkimin Europian. Sipas tij, numri i shqiptarëve që kanë humbur vendin e punës për shkak të pandemisë është më i larti në Rajon, ndërsa ndihma e Qeverisë ndaj tyre është më e ulëta në Botë.
“Sot shqiptarët janë në varfëri jo për faj të BE-së, por për shkak të dështimit të Edi Ramës. Tirja e Qeverisë i ka marrë paratë 97 % të shqiptarëve, për t´ia dhënë një grushti oligarkësh. Lajmi i mirë sot është se kjo qeverii ka ditët e numëruara, ndërsa ne do të ringremë ekonominë bashkë me ndihmën e Bashkimit Europian”, tha Basha.
Sipas tij, tashmë të gjithë shqiptarët e dinë që Edi Rama ka dështuar, ndërsa ne do të ringremë ekonominë dhe do të rikthejmë shpresën.
“Ka shpresë, ne do ta rikthejmë Shqipërinë në rrugën e rritjes dhe zhvillimit. Rama rriti taksat për 97 % të shqiptarëve dhe favorizoi një grusht oligarkësh”, tha Basha.
