Presidenti i Republikës, Ilir Meta i është kthyer sërish debatit për rrugën e Selenciës në Vlorë. Gjatë një takimi, që Kreu i Shtetit zhvilloi me banorët e kësaj zone, ai kërkoi që rruga të ndërtohet menjëherë dhe banorët të mos penalizohen më nga arroganca dhe korrupsioni.
Në një postim në FB, kreu i Shtetit thotë se banorët i ka informuar në detaje për të gjitha përpjekjet e tij për ndërtimin pa vonesa të kësaj rruge.
“Mezi kisha pritur të vizitoja Selenicën, këtë qytet me pasuri natyrore të jashtëzakonshme, por të braktisur prej vitesh në mjerim e vuajtje, për të biseduar hapur, sy më sy, me kërkesë të tyre, me banorët e mrekullueshëm të saj.
Më njohën me problemet e shumta të përditshmërisë së tyre, nga mungesa e vendeve të punës, investimeve dhe shfrytëzimi pa kriter i tokave bujqësore nga biznesmenë të lidhur me pushtetin.
Të gjithë ishin njëzëri në kërkesën kryesore, ndërtimin e rrugës.
I informova në detaje për të gjitha përpjekjet e mia të palodhura për ndërtimin pa vonesa të saj dhe për të mos lejuar më talljen me Selenicën, duke i garantuar se përherë do të jem në krahun e tyre.
RRUGA E SELENICËS TË NDËRTOHET MENJËHERË dhe banorët e kësaj zone të mos penalizohen më nga arroganca, braktisja dhe korrupsioni”, shkruan Meta ne Facebook.
