Gjykata e Vlorës caktoi masën e sigurisë me burg për shtetasin Qazim Ismailaj, i cili akuzohet për dhënie ndihme për kalim të paligjshëm të kufirit nga emigrantët sirianë.
32-vjeçari nga fshati Trevllazër dyshohet se ka strehuar në banesën e tij sirianë, të cilët e përdornin Shqipërinë si trampolinë për të kaluar në vendet e BE-së me destinacion final.
Ai u arrestua dhe u përball me gjykatën pas dëshmive të dhëna nga vetë sirianët, të cilët u shpëtuan pas 3 orësh qëndrimi në det të hapur.
Seanca për vendosjen e masës së sigurisë u zhvillua në Gjykatën e Vlorës, pa praninë e mediave. Ismailaj u arrestua në 15 janar së bashku me Fatos Dushën. Ata akuzohen lidhur me ngjarjen e ndodhur në 8 janar, ku 50 sirianë, rrezikuan të mbyteshin ndërsa ndodheshin në bordin e një gomoneje. Mes tyre gra dhe fëmijë u rreziku në mes të detit.
Sirianët pasi ishin fshehur në Vlorë, të ndihmuar nga personat e arrestuar dhe të tjerë po tentonin që të kalonin me gomone në Itali.
