Sot është dita e fundit për subjektet politike në Kosovë që të dorëzojnë listat e tyre me emrat e kandidatëve për deputetë, për zgjedhjet e 14 shkurtit.
Në mediat kosovare raportohet se deri më tani vetëm 10 subjekte politike me gjithësej 210 kandidatë, kryesisht nga radhët e komuniteteve, kanë dorëzuar në KQZ aplikimin për certifikim për pjesëmarrje në zgjedhje, si dhe listën me emrat e kandidatëve për deputetë.
Pas Aktgjykimit të Gjykatës Kushtetuese, ku konstatohet se personi i dënuar për vepër penale me një vendim gjyqësor të formës së prerë në 3 vitet e fundit, nuk mund të jetë kandidat për deputet.
KQZ-ja ka bërë të ditur se do t’i dërgojë listat me emrat e të gjithë kandidatëve në Këshillin Gjyqësor të Kosovës.
Po ashtu, listat me emrat e kandidatëve për deputetë do t’iu dërgohen edhe në 5 institucione tjera përveç KGJK-së, në Ministri të Punëve të Brendshme, në Ministri të Punëve të Jashtme, në Ministri të Mbrojtjes, në Agjencinë e Kosovës për Inteligjencë dhe në Panelin Zgjedhor për Ankesa dhe Parashtresa.
Sipas zëdhënësit të KQZ-së, Valmir Elezi listat me emrat e kandidatëve për deputetë do t’iu dërgohen këtyre institucioneve deri më 18 janar, ndërsa do të presin përgjigje deri më 20 janar.
“Nëse një kandidat nuk do të certifikohet nga KQZ, do të mund të bëjë ankesë në Panelin Zgjedhor për Ankesa dhe Parashtresa dhe pastaj çështja mund të shkojë edhe në Gjykatën Supreme”, tha Elezi. Fushata zgjedhore për subjektet politike do të fillojë më 3 shkurt.
