Rilindja duket se do të përdorë çdo manovër për të mbledhur votat në zgjedhjet e 25 prillit. Pavarësisht apeleve dhe paralajmërimeve, akteve normative të KQZ dhe asaj që ndërkombëtarët presin nga zgjedhjet e ardhshme parlamentare, të besuarit e Kryeministrit në fushatë nuk ndalen.
Në një postim që ka në facebook, i dërguari i Ramë në Finiq, Damian Gjiknuri shkruan se “në takimin e zhvilluar me shtabin elektoral të Partisë Socialiste në Bashkinë e Finiqit. Punët e mira të kryera nga pushteti vendor dhe mbështetja e vazhdueshme e qeverisë qendrore me investime janë tregues i bashkëpunimit të suksesshëm dhe bashkëjetesës në këtë zonë me popullsi minoritare. Aleanca politike mes PS dhe MEGA në Bashkinë e Finiqit do të sigurojë nje rezultat elektoral rekord në 25 Prill”.
Por ajo që tërheq vëmendjen është se në tryezë ndodhet edhe flamuri grek. Shpesh Rama është akuzuar nga opozita e bashkuar si tradhëtar i interesit kombëtar dhe në kulmin e akuzave për kufirin detar me Greqinë, një prej të besuarve të Kryeministrit shfaqet në një zonë minoritare me flamurin grek.
Ndoshta vetë Damiani nuk e ka shumë përzemër të mbajë një flamur të tillë, por ndonjëherë halli për një grusht votash të bën që të dukesh jo vetëm si dashamirës ndaj minoriteteve por edhe mbështetës i tyre.
