Aksidentet rrugore janë kthyer në një shqetësim për jetën e qytetarëve, ku krahas rrezikut të jetës për drejtuesit dhe pasagjerët, po rrezikohen dhe këmbësorët në vijat e bardha. Pas aksidentit tragjik në Rrugën e Kombit ku u shua familja nga Kosova, tre përplasje të tjera u shënuan në kryeqytet ku mjetet nuk kursyen as efektivët e policisë rrugore.
Pamjet e djeshme të aksidentit në Tiranë te TVSH, ishin të frikshme. Por edhe sot u përsërit e njëjta skemë, me pasojë një kalimtar të plagosur, pas përplasjes së dy automjeteve.
Aksidenti i rëndë ndodhi pranë kryqëzimit të “5 Majit”, ndërsa sipas burimet bëjnë me dije se kalimtari është gjymtuar nga këmbët si pasojë e përplasjes.
Siç shikohet dhe nga pamjet kanë qenë kangjellat e vendosura anës rrugës që kanë frenuar automjetin, çka pas përplasjes mund të kishte çuar në humbjen e jetës së këmbësorit.
Aksidentet nuk kanë kursyer as efektivët e policisë rrugore, ku mesditën e kësaj të premte u përplas 40-vjeçarja Arta Shurbi, e cila ndodhej në shërbim pranë Kthesës së Kamzës.
Efektivja e policisë është përplasur nga një kamion i tonazhit të rëndë.
Ndihmën e parë 40-vjeçarja e ka marrë kolegët, të cilët e kanë dërguar pranë Spitalit të Traumës. Mjekët thonë se efektivja fatmirësisht është jashtë rrezikut për jetën.
Aksidenti tjetër i rëndë ndodhi në afërsi të qendrës së kryeqytetit, pranë Ambasadës italiane, ku dy mjete u përplasën në kryqëzim.
Siç shikohet dhe nga pamjet, automjeti tip”BMW” futet në semafor me të kuqe dhe përplas mjetin tjetër tip “Skoda”, i cili përfundon disa metra më larg.
Si pasojë e përplasjes u rrezikua jeta e dy këmbësorëve, të cilët po kalonin tek vijat e bardha.
Fatmirësisht nga aksidenti kishte vetëm dëme materiale, ndërsa policia ka nisur hetimet për përplasjen e mjeteve.
Aksidentet rrugore janë kthyer në një shqetësim, pasi në dy javët e para të vitit të ri kanë humbur jetën më shumë se 10 persona për këto shkaqe, ndërsa janë dëmtuar dhjetëra të tjerë.
Aksidenti më tragjik ishte ai i regjistruar pasditen e të enjtes ku një familje nga Kosova u shua pas përplasjes së makinës me të cilën udhëtonin me një kamion.
Nga përplasja fatale shpëtoi shoferi i kamionit si dhe fëmija 3 vjeç i cili ndodhet jashtë rrezikut për jetën.
