Rektorati i Universitetit të Tiranës tallet me studentët, të cilët iu drejtuan me një kërkesë për heqjen e tarifave të studimit.
Por Rektorati në përgjigjen e kthyer ndaj studentëve shprehet se tarifat e studimeve për ciklin e dytë nga 25 mijë lekë është ulur në 20 mijë lekë, ndërsa për ciklin e parë nuk kanë ndryshuar, krahasuar me vitin e mëparshëm akademik.
Kjo ka sjellë reagimin e Lëvizjes për Universitetin, sipas të cilës, në kushtet ku studentët nuk po e përdorin infrastrukturën universitare, heqja e tarifave është një domosdoshmëri edhe më e madhe se më parë.
“Pavarësisht kërkesave dhe pakënaqësisë së vazhdueshme studentore, Ministria e Arsimit nuk ka reaguar, madje nuk ka marrë parasysh as peticionin e nënshkruar nga 8000 studentë për anulimin e tarifave.
Një kërkesë e tillë i është bërë edhe Rektoratit të Universitetit të Tiranës nga njëra prej aktivisteve të Lëvizjes Për Universitetin. Përgjigjja e Rektoratit është tallëse dhe e turpshme.
Ne, aktivistët e Lëvizjes Për Universitetin, kemi luftuar për anulimin e tarifave studentore që nga viti 2014, ndaj përgjigje të tilla vetëm sa na e shtojnë më shumë bindjen dhe revoltën deri në arritjen e arsimit publik falas”, thuhet në reagimin e Lëvizjes për Universitetin.
