Kryetarja e LSI-së Monika Kryemadhi dhe nënkryetari e kësaj partie, Petrit Vasili, kanë zhvilluar një takim me banorët e njësisë numër 5 në Tiranë.
Kryemadhi tha se Tirana vuan nga trafiku i tmerrshëm dhe se për bizneset janë 10-fishuar taksat. Ajo shtoi se duke votuar më 25 prill, duhet të sjellim ndryshimin e shumëpritur.
“Në fakt kur unë pardje erdha nga Shkodra, më është dashur 45 mi8nuta për të ardhur nga Shkodra deri afër Institutit dhe pastaj më është dashur 2 orë e gjysmë nga Instituti për të vajtur në Fresk. Një tmerr i vërtetë, dhe ishte një zinxhir i madh betonieresh. Njerëzit thonë që më shumë harxhojmë karburant për t’u rrotulluar për parkim edhe në trafik, sesa harxhojmë karburant për të shkuar në punë”, tha Kryemadhi.
Por sipas saj, një nga problematikat më të mëdha që ne e ndjejmë gjithmonë është edhe çështja e punësimit.
“Mungesa e vendeve të punës, edhe ata që janë në punë mungesën e një pune të mirëpaguar. Taksat e larta që janë stratosferike, dhe jo vetëm që janë dyfishuar, por kanë kaluar dhe për biznesin e vogël janë dhjetëfishuar. Dje mbasdite takuam banorë tek zona e Ali Demit dhe një biznesmen thoshte që unë paguaja 300 mijë lekë taksë tabele, sot paguaj 6 milion lekë taksë tabele sepse ma kanë bërë me sipërfaqe, me metër katrorë. Por nuk është vetëm këtu problemi. Problemi është që ti paguan aq vetëm për tabelën, pa llogaritur pastaj të gjitha taksat e tjera”, shtoi ajo.
Ndërsa nënkryetari i LSI, Petrit Vasili, u shpreh se “Tirana është kthyer në kurth të vërtetë, nuk ka hapësira”.
“Në Tiranë nuk ke ku ecën. Tirana dikur ka qenë qytet miqësor. Duhet të ndryshojmë realitetin, me votë. Kemi në pushtet të babëzitur, që hanë Tiranën dhe Shqipërinë. Me votë, të ndryshojmë qytetin tonë. Trafiku në kryeqytet është i tmerrshëm”, tha Vasili.
