Pasi mori premtimin nga Presidenti turk Taip Rexhep Erdogan për ndërtimin e spitalit rajonal të Fierit para datës 25 prill, Kryeministri Edi Rama caktoi një tokë arë si vendin ku do të ndërtohej godina. Ai madje urdhëroi Kryebashkiakun e Fierit Armando Subashi që të kontaktonte pronarët dhe të niste procesi i shpronësimeve.
Subashi menjëherë vuri në zbatim urdhërin, thirri rreth 20 pronarë të tokës, pranë By-Pass të Fier, dhe kur u ndesh me kundërshtitë e tyre, nuk nguroi që edhe ti paralajmëronte se shpronësimi do të bëhej, qoftë edhe forcërisht me një vendim qeverie.
Pas kësaj, pronarët protestuan, duke u shprehur se toka ishte arë, ajo ishte burimi i vetëm i të ardhurave të familjeve të tyre dhe nuk pranonin asnjë çmim për pronësimin.
Kryeministri u shfaq dje në një konferencë, duke i qëndruar idesë se spitali do të ndërtohej pikërisht në atë vend, që ai gjatë një ecjeje në krah të Subashit, i vuri gishtin dhe e caktoi.
Sot Kryeministri pritet të shkojë në Fier, pronarët e tokës sërisht janë në protestë, ndërsa policia është instaluar pikërisht në atë zonë.
Një skenar i ngjashëm me atë që ndodhi kur u shembën banesat pranë ish-stacionit të Trenit në Tiranë apo në zonën e Unazës së Madhe, kur pas kundërshtive banorët u përzunë me gaz lotsjellës. Sot ndoshta ska nevojë për gaz, thjesht ata qytetarë mund të ndalohen nga policia qoftë edhe për tubim të paligjshëm.
