Nga dita e djeshme në Shqipëri ka nisur vaksinimi kundër Covid-19, ndërsa të parët që provuan vaksinat, ishin Krzeministri Edi Rama dhe disa prej mjekëve të njohur të spitalit Infektiv.
Por i gjithë ky proces nisi me dyshimeve jo vetëm mbi llojin e vaksinës, por edhe me vendin nga ka ardhur ajo. Kryeministri Edi Rama vendosi të mos e përmendë shtetin që solli dozat e para të vaksinave, 975 të tilla, me pretendimin se ky është konfidencial dhe se është kërkuar pikërisht nga autoritetet e këtij vendi.
Por gjithashtu nga goja e Kryeministrit nuk u tha as çmimi me të cilin është siguruar kjo vaksinë dhe as lloji i saj.
Rama tha se çmimi është i njëjtë për këdo, kur në fakt mediat botërore kanë raportuar se ka një diferencë në çmim mes asaj që ka siguruar Bashkimi Europian dhe SHBA.
Në orët e mbëmjes së djeshme, mjeku i njohur Pëllumb Pipero tha se vaksina ishte Pfizer/Biontech, se ai kishte lexuar udhëzuesit, por nuk ishte në gjendje të pohonte se nga kishte ardhur vaksina.
Dhe përtej gjithë pikëpyetjeve të mësipërme, institucionet shqiptare duken të pakordinuara edhe për një tjetër detaj, numrin e vaksinave që mund të sigurohen, duke pasur parasysh zinxhirin ftohës, por edhe numrin e vaksinave që mund të realizohen në ditë.
Ministria e Shëndetësisë, Ogerta Manastirliu, e pyetur në një studio televizive se sa janë kapacitetet e Shqipërisë për të ruajtur në zinxhirin ftohës vaksinën, ajo u mburr se mund të ruhen deri në 250 mijë doza.
“Me kapacitetin aktual pra me rrjetin e frigoriferëve që kemi në minus 70 gradë, sipas edhe çfarë ekspertët kanë vlerësuar, ne jemi në gjendje që të kemi një kapacitet ftohës për këtë vaksinë deri në 250 mijë doza. Ndërkohë që jemi duke punuar për ta rritur akoma më shumë këtë kapacitet”, deklaroi Manastirliu.
Po të njëjtën mbrëmje këtë deklaratë të ministres e ka përgënjeshtruar shefja e Programit Kombëtar të Vaksinimit, Erida Nelaj, e cila drejton institucionin që është direkt përgjegjës për operacionin e vaksinimit.
“Ne kemi kapacitet 30 mijë doza njëherë. Po punojmë për të zgjeruar kapacitet. Në përgjithësi i kemi kapacitetet”, ka deklaroi Nelaj për televizionin Euronews.
Ndërkohë që ende nuk dihen kapacitetet, të paktën nga deklaratat e mësipërme, sërisht nuk dihet se sa persona mund të vaksinohen në ditë.
Sot është parashikuar të vaksinohen 60 persona, por Silva Bino, një prej eksperteve të ISH-së, thotë se mund të vaksinohen deri në 600 persona në ditë. Dhe nëse kjo është e vërtetë, atëherë kur pritet të mbërrijë partia e parë e vaksinave nga Pfizer prej 10750 vaksinash, do të duhen mesatarisht 18 ditë për të përfunduar.
Shumë prej vendeve europiane po ndeshen pikërisht me problemin e vaksinimit, pasi nuk po munden që brenda afatit që parashikohet të përdorin dozat e programuara, çka duket se disa nga vendet e BE-së, ato që konsiderohen si dozat e tepërta, tia japin vendeve jashtë Unionit.
