Kryeministri Edi Rama, pak ditë më parë, në krah të krzebashkiakut Armando Subashi, caktoi një vend në Fier, ku do të ndërtohej spitali i Fierit, një premtim që u bë nga Presidenti i Turqisë, Rexhep Taip Erdogan.
Toka që caktoi Rama ishte pranë By-Pass së Fierit, ndërsa Kryeministri urdhëroi Kryebashkiakun që të kontaktohen pronarët dhe të nisë shpronësimi.
Sipërfaqja e tokës bujqësore shpronëson rreth 20 familje, ndërsa ditën e djeshme pronarët janë thirrur nga Kryebashkiaku Subashi në një takim, ku i është komunikuar vendimi për shpronësimin e tyre.
Sot banorët kanë protestuar dhe kundërshtuar vendimin me argumentin se toka është bujqësore dhe ata nuk kanë asnjë mundësi tjetër për të siguruar të ardhurat e tyre.
Banorët janë shprehur se janë intimiduar nga Subashi, i cili i ka dklaruar se “toka mund tu merret me forcë, me një vendim Qeverie”.
“Do t’i drejtohemi edhe Ambasadës turke lidhur me këtë problematikë, pasi kjo është tokë bujqësore dhe është burimi i vetëm ekonomik që kemi. Ne nuk negociojmë për çmimin e tokës, pasi kjo mbetet e vetmja mënyrë që ne mund të sigurojmë jetesën”, tha një prej pronarëve të sipërfaqes së caktuar nga Rama si ideale për ndërtimin e spitalit.
