Të gjitha bizneset që kryejnë trasaksione me institucionet shtetërore nga 1 janari kanë detyrimin të bëhen pjesë e fiskalizimit dhe të lëshojnë vetëm fatura elektronike.
Drejtorja e tatimeve Delina Ibrahimaj shprehet se në ditët e para të muajit janar numri i bizneseve që lëshojnë fatura online mbetet i vogël .
“Nga data 1 dhe deri në 5 janar janë lëshuar 3500 fatura me para në dorë dhe 19 pa para në dorë. Numri është i ulët pasi duhet të kuptojmë se për faturat tatimore të janarit mund të bëhet dhe në shkurt”, është shprehur ajo.
Por nëse këto subjekte nuk do të zbatojnë ligjin atëherë do të penalizohen. Drejtorja e tatimeve paralajmëron se të gjitha subjektet që kryejnë transaksione me shtetin nuk do të marrin pagesa nga thesari i shtetit, nëse nuk lëshojnë fatura elektronike .
“Nuk do të ketë pagesa në thesar për faturat që nuk janë elektronike, dhe entet rregullatore nuk do të pranojnë fatura që nuk janë të tilla”, ka thënë Ibrahimaj
Pavarësisht se Banka Botërore e ka cilësuar të komplikuar sistemin tatimor në vend dhe është shprehur kundër ndryshimeve fiskale, gjatë këtij viti ka hyrë në fuqi rritja e pragut të TVSH nga 2 mln në 10 mln ,heqja e tatim-fitimit si dhe rritja e pagës minimale.Drejtorja e tatimeve deklaron se do të monitorojnë me kujdes këto ndryshime për të shmangur abuzimet.
Që prej 1 janarit në Shqipëri rreth 7600 subjekte që kryejnë transaksione me shtetin kanë nisur të aplikojnë procesin e fiskalizimit. Më pas në 1 korrik fiskalizimi do të nisë edhe për trasaksionet biznes me biznes ndërsa në 1 shtator do të shtrihet në të gjitha trasaksionet që kryhen në vend./abcnews.al
