Presidenti turk, Rexhep Taip Erdogan, u shpreh sot në konferencën e përbashkët për mediat me Kryeministrin Edi Rama, mbi Organizatën Feto, që e konsideroi si terroriste dhe të rrezikshme për të dy vendet.
Erdogan tha se Turqia do të ndihmojë Shqipërinë edhe në këtë drejtim, çka ka lënë të nënkuptohet se kjo ishte një nga pikat e diskutuara në takimin me Ramën.
Deklaratat e Presidentit turk u paraprinë nga nënshkrimi i një marrëveshjeje të nivelit të lartë me Kryeministrin Edi Rama, që angazhon institucionet e dy vendeve që të shtojnë bashkëpunimin në të gjitha fushat. Madje Erdogan e cilësoi si një dokument që vendos raportet mes dy vendeve në partneritet strategjik.
Ndërkohë, Erdogan, në fjalën e tij gjithashtu u shpreh se Turqia do të rrisë investimet në Shqipëri. Ai tha se mes dy vendeve është nënshkruar marrëveshja për krijimin e bashkëpunimit strategjik në nivelin e lartë.
“Jam shumë i kënaqur që pres sot në Ankara kryeministrin Rama. Shqipëria është një vend mik, vëlla dhe aleat. Ne jemi dy popuj vëllezër, që kemi lënë gjurmë në histori. Gjurmët mund të shikohen në shumë fusha të gjera. Nga Elbasani në Korçë apo nga Shkodra në Vlorë, gjenden gjurmë të lashta. Ne e kemi detyrë ta forcojmë këtë lidhje.
Me rastin e vizitës, sapo nënshkruam marrëveshjen për krijimin e bashkëpunimit strategjik në nivelin e lartë. Ky hap do të mundësojë zhvillimin e mëtejshëm në çdo fushë.
Ne diskutuam edhe çështje të tjera rajonale, si dhe në shumë fusha të tjera se çfarë mund të bëjmë ne në projektet e mëpasshme.
Shqipëria përjetoi dy tërmete të fuqishme dhe pas çdo tërmeti ne dhamë ndihmën tonë. Ne vendosëm të ndërtojmë edhe 522 njësi banimi për vëllezërit tanë. Shpresojmë që të përfundojë ndërtimi në gusht dhe t’ua dorëzojmë këto ndërtesa vëllezërve tanë. Besoj se ky do të jetë një simbol i ri i fatit të përbashkët të dy vendeve. Gjatë takimit, ne vlerësuam këto çështje dhe marrëdhëniet tona ekonomike. Ne jemi investitori më i madh i huaj në Shqipëri. Më shumë se 600 kompani turke që ofrojnë punësim për rreth 15 mijë vëllezër. Në synojmë të rrisim investimet në fushën e infrastrukturës dhe turizmit”, tha Erdogan.
Ndërkohë, presidenti i Turqisë theksoi se do të intensifikohet edhe bashkëpunimi në luftën ndaj terrorizmit mes dy vendeve.
