Kryeministri i Shqipërisë, Edi Rama, me ftesë të presidentit të Turqisë, Recep Tayyip Erdogan, nesër do të zhvillojë një vizitë zyrtare në Turqi, transmeton Anadolu Agency (AA).
Në njoftimin nga Drejtoria e Komunikimeve të Presidencës së Turqisë, thuhet se në takimet që do të zhvillohen në kuadër të vizitës më 6-7 janar, marrëdhëniet bilaterale midis Turqisë dhe Shqipërisë do të rishikohen në të gjitha dimensionet, si dhe do të trajtohen hapat që mund të merren për zhvillimin e bashkëpunimit.
Në takime gjithashtu do të shkëmbehen mendime mbi zhvillimet aktuale rajonale dhe ndërkombëtare, si dhe marrëdhëniet dypalëshe.
Rreth dy javë më parë Presidenti i Turqisë, Rexhep Taip Erdogan ishte në një lidhje direkte në ceremoninë e nisjes së punimeve për rindërtimin e banesave në Laç, të cilat u dëmtuan nga tërmeti.
Erdogan premtoi se do ti qëndrojë pranë popullit shqiptar.
Vizita e Ramës në Turqi dhe takimi me Erdogan vjen në një kohë kur autoritetet greke kanë miratuar dekretin që i jep të drejtën Greqisë për zgjerimin e kufirit detar me 12 milje, ndërsa Kryeministri Rama ka deklaruar se kjo është një e drejtë e çdo shteti, kur është e mundur.
Mediat greke i kanë bërë jehonë deklaratave të Edi Ramës.
Artikulli veçon citimin e Ramës i cili e shpjegon zgjerimin e Greqisë si një e drejtë sovrane e njohur nga Ligji Ndërkombëtar i Detit.
“Ishte një e drejtë sovrane e njohur nga Ligji Ndërkombëtar i Detit për të zgjatur ujërat e saj territoriale në 12 milje në secilin vend me dalje në det kur kjo shtrirje nuk cenon interesat e një vendi tjetër”, tha ai, duke theksuar se “kjo zgjatje nuk ka asnjë lidhje me ne “, për të shtuar me ironi se” Joni nuk mbaron në Konispol “(kufiri jugor i Shqipërisë me Greqinë).
Ndoshta këto deklarata të Kryeministrit Rama mund të diskutohen në takimin që ai do të ketë me Presidentin turk.
