Me përfundimin e festave të fundvitit, para spitaleve Covid, atje ku trajtohen pacientët e prekur me rëndë nga koronavirusi, është shtuar prezenca e të afërmve të tyre.
Nga raportimet mësohet se veçanërisht kjo prezencë është shtuar në spitalin Infektiv, i kthyer prej 9 muajsh në “Covid1”. Familjarët qëndrojnë përtej rrethimit të sigurisë, ndërsa presin të marrin informacione mbi gjendjen shëndetësore të të afërmve.
Duket se përgjatë ditëve të festave, ata nuk kanë mundur të marrin informacione nga mjekët apo stafet mjekësore lidhur me gjendjen shëndetësore të të afërmve, çka duket se i ka detyruar që sot të shkojnë para spitalit, në pritje për të marrë informacione, apo dorëzuar qeset me ushqime dhe veshje.
Një ditë më parë Ministria e Shëndetësisë njoftoi zyrtarisht se aktualisht në spitalet Covid po trajtohen 295 pacientë, 32 në terapi intensive nga të cilët 4 pacientë janë të intubuar.
Ndërkaq, numri i fataliteteve si pasojë e koornavirusit një ditë më parë në vend, ishte 3 humbje jete në spitale Covid.
Në ditët e para të Janarit ka pasur raportime për një ulje të rasteve me Covid-19, por duhet theksuar se edhe testet kanë qenë në nivele të ulëta.
