Kryeministri Edi Rama ka sulmuar, në konferencën e fundvitit, ato që konsiderohen parti të vogla, duke u shprehur se ato nuk janë produkt i një procesi pluralist dhe demokratik, por janë krijuar për të marrë pjesë në plaçkë.
“Nuk është sekret. Koha ka treguar që një numër partish të quajtura të vogla, nuk janë produkt i vyer pluralist dhe demokratik por janë parti të cilat krijohen për të marrë pjesë në plaçkë. Nuk ka asnjë dyshim nga ana ime për këtë. Njerëzit tani do mund të zgjedhin partinë dhe deputetin që dëshirojnë dhe fitoftë më i miri”, tha Rama.
Ndërkohë Kryeministri ka ripërsëritur edhe njëherë disa nga nismat ligjore si ajo për ligjin mbi kompetencat e Presidentit, amnistia fiskale, legalizimi i kanabisit dhe ligji i anti-shpifjes.
Rama deklaroi se ligji që kufizon kompetencat e Kreut të Shtetit është në procedurë, ndërkohë sa i përket aministisë fiskale po punohet me partnerët për një draft sa më të dakordësuar. Përsa i takon paketës anti-shifje, Rama duket se është tërhequr nga pozicioni fillestar, veçanërisht pas kritikave ndërkombëtare, ndërsa u shpreh se nuk ka asnjë ngut dhe do bëhet me dakordësinë e të gjithëve.
“Ligji për presidentin është në procedurës. Sa i përket amnistisë vazhdojmë të punojmë me partnerët për një draft sa më të dakordësuar. Sa i përket anti-shpifjes ajo u katandis në një alibi për disa, dhe jemi në proces komunikim me të gjitha palët e përfshira.
Është një marrëzi me vete. Jemi në proces komunikimi. Nuk kemi asnjë ngut. Do bëhet kur të kemi dakordësi me të gjithë. Nuk e kam kërkuar për vete se për vete mbaj një sasi të madhe shpifjesh në kurriz dhe deri më tani më është bërë vetëm shëndet. Për kanabisin jemi duke rafinuar draftin”, tha Rama.
