Greqia duket se po përdor Shqipërinë për t´i çuar paralajmërime Turqisë lidhur me kufirin detar.
Mediat greke shkruajnë se Greqia po i dërgon një mesazh direkt e “në të gjitha drejtimet Turqisë, e cila vijon me veprimet e saj provokuese edhe pas Samitit të Dhjetorit, duke zbatuar Dekretin Presidencial”.
Sipas mediave greke, dekreti i zgjerimit të kufirit detar me 12 milje, është një akt që e sjell vendin një hap më pranë përfundimit të procesit për zgjerimin e zonës bregdetare në Jon.
Duke cituar burime qeveritare, mediat raportojnë se “Greqia nuk ka frikë që të zbatojë dhe ushtrojë të drejtat e saj, kur e gjykon të përshtatshme në shkallë vendi”.
“Sipas një njoftimi përkatës të Ministrisë së Punëve të Jashtme, Dekreti Presidencial u lëshua në zbatim të ligjit ratifikues të Konventës së Kombeve të Bashkuara 1982 mbi Ligjin e Detit.
Ky është një hap i domosdoshëm për procesin e zgjerimit të zonës bregdetare të vendit në zonën e mësipërme, një veprim i cili është, sipas Konventës, një e drejtë e patjetërsueshme e vendit.
Dekreti Presidencial thotë se Greqia rezervon të drejtën të ushtrojë të drejtat e saj përkatëse në pjesë të tjera të territorit të saj, pasi ato rrjedhin nga Konventa mbi Ligjin e Detit, e cila pasqyron të drejtën zakonore ndërkombëtare,” citohet të ketë njoftuar Ministria e Jashtme e vendit.
“Greqia është e vendosur në mënyrë rigoroze për mbrojtjen e së drejtës ndërkombëtare, përfshirë ligjin e detit, gjithmonë vepron në përputhje me ligjin ndërkombëtar,” përfundon deklarata.
Ndërsa, duke iu referuar reagimeve në Shqipëri, ato cilësohen si intensive, përmendet reagimi i Partisë Demokratike si dhe reagimet e kryeministrit Rama.
Dekreti ka shkaktuar debate në politikën shqiptare, ku opozita akuzon Kryeministrin Edi Rama për tradhëti, ndërsa ky i fundit i cilëson akuzat si dokrra, ndërsa shprehet se kufiri detar mes dy vendeve do të përcaktohet nga Gjykata Ndërkombëtare.
Partia Demokratike i ka kërkuar Ramës që të bëjë publike dhe transparente çdo marrëveshje, veprim ose mosveprim, lidhur me çështjen e kufirit detar.
Një ditë më parë u njoftua se ka hyrë në fuqi dekreti presidencial i Greqisë për zgjerimin e kësaj të fundit me 12 milje në detin Jon.
MEPJ e Greqisë thekson se dekreti është publikuar në Fletoren Zyrtare, duke u bërë kështu i vlefshëm.
Përcaktimi i vijave bazë në rajonin e Detit Jon dhe mbyllja e gjireve, si dhe zgjerimi i ujërave territoriale në Detin Jon, hapin rrugën për hartimin e marrëveshjes Greqi-Shqipëri, në Gjykatën Ndërkombëtare të Drejtësisë në Hagë.
Për zgjidhjen e mosmarrëveshjeve mes dy vendeve, është rënë dakord gjatë vizitës së ministrit të Jashtëm, Nikos Dendias, në Tiranë, dhe takimit që ai pati me Kryeministrin shqiptar, se çështja mbetet e hapur nga viti 2009, kur Greqia nënshkroi një marrëveshje për zonën detare, e cila u anulua nga Gjykata Kushtetuese e Shqipërisë.
Pas vizitës së ministrit të Jashtëm grek në Tiranë, Nikos Dendias, Kryeministri Rama tha se të dyja vendet do t’i drejtohen Gjykatës Ndërkombëtare të Hagës për çështjen e kufirit detar dhe Zonave Ekskluzive Ekonomike.
