Gjykata e Tiranës ka vendosur të lejojë ekstradimin në Itali të Gentian Manajt, i dyshuar si pjesë e një karteli shqiptar, që trafikonte sasi të mëdha droge nga Amerika Latinë në Europë.
35-vjeçari Manaj, i njohur edhe me emrin, Myzafer, u arrestua në 15 shtator në kryeqytet, për llogari të operacioni policor ndërkombëtar anti-drogë, të koduar “Los Blancos”. Ai u prangos në zbatim të një urdhër-kërkimi ndërkombëtar nga Interpol Roma në Itali, pasi gjykata e Firencës kishte caktuara për të një masë sigurimi “arrest në burg”.
Drejtësia italiane akuzon Manajn për “organizatë kriminale” dhe “trafik ndërkombëtar të lëndëve narkotike”. Referuar vendimit të gjykatës, të siguruar nga A2, përmes avokatit Manaj ka kundërshtuar ekstradimin, duke pretenduar se nuk bëhej identifikimi i tij në lidhje me veprën penale. Sipas avokatit, prokuroria ka prezantuar një profil kriptotelefonik me nofkën “Bahamas”, por nuk ka shpjeguar si arrihet në përkimin me Gentianin.
Manaj ishte një nga 5 të arrestuarit në Shqipëri nga operacioni “Los Blancos”, i koordinuar nga Europol, i cili u shtri në Itali, Shqipëri, Belgjikë, Emiratet e Bashkuara Arabe, Gjermani, Greqi, Holandë, Rumani, Hungari dhe Ekuador.
Pesë shqiptarë të tjerë u prangosën në vende të ndryshme të Europës. Rol të rëndësishëm në këtë organizatë dyshohet të ketë pasur Dritan Rexhepaj, i cili ndodhet në një burg në Ekuador. Sipas hetimit, karteli importonte ngarkesa të mëdha kokaine nga Amerika Latine, të financuara nga grupe të rëndësishme të trafikantëve të drogës që veprojnë në të gjithë Europën.
“Los Blancos” ishte finalizimi i një hetimi 5-vjeçar të autoriteteve italiane, gjatë së cilit janë arrestuar 114 persona, sekuestuar 4 ton kokainë, 9 kg heroinë dhe 5.5 milionë euro, para të thata./A2
