Nga Boldnews.al
Ministri i Brendshëm Bledi Çuçi, daljen e parë publike në këtë post të rëndësishëm, e pati rreth sondazhit mbi perceptimin e publikut për punën e Policisë së Shtetit. Në shtatë minutat e para të prezantimit të sondazhit, (ku Çuçi ngjante me “kolegun” Zaloshnje), përmendi 12 herë fjalën “spektakolare”…
Kjo do të jetë fryma e drejtimit të kësaj ministrie; propagandë, imazh i stisur dhe spektakël llafologjishë që edhe çështjen e rendit, sigurisë dhe krimit, e shohin si shfaqje teatrale për të mbuluar të vërtetat e hidhura që fshihen pas veshjes së rëndë të Policisë së Shtetit.
Por në këtë “sondazh spektakolar” sipas Çuçit, nuk kishte pyetje: a janë të lidhur eksponentë të rëndësishëm të policisë me trafikun e drogës? Si është perceptimi i publikut për sjelljen e policisë ndaj protestive? A është e politizuar policia e shtetit në disa struktura të veçanta?
Këto janë pyetjet që sot shqetësojnë qytetarët, që ndihen të dhunuar sapo shohin një efektiv policie hijerëndë, i cili të sheh jo si protestues në një sistem demokratik, por si “kriminel që lëndon qeverinë”.
Nëse në atë sondazh do ishte pyetja sesi e percepton publiku agresivitetin e policisë, përgjigjja mund të ishte “spektakolare”…
Ministri i Brendshëm, Bledi Çuçi shprehu kënaqësinë e tij për arritjet e realizuara siç tha nga Policia e Shtetit, arritje këto të vëna në pah nga një anketim i qeverisë suedeze mbi perceptimin e publikut për Policinë e Shtetit.
“Gjetjet e hulumtimit shkencor të opinionit qytetar janë dëshmi e pakontestueshme e arritjeve të reformimit rrënjësor të Policisë së Shtetit”, tha Çuçi, duke shtuar se shumica dërrmuese e shqiptarëve aprovojnë punën e Policisë së Shtetit dhe shifrat e studimit, flasin qartë se jemi në kornizën europiane në shumë parametra të sigurisë.
“Ndjehem shumë mirë për këtë komunikim të policisë me publikun dhe ndryshim të punës së policisë nga publiku. Sondazhi vjen në një moment pak specifik, javën e kaluar kemi përjetuar një situatë pak jo të zakonshme, por që nxori në sipërfaqe atë kategori njerëzish që s’lënë pa hedhur baltë mbi punën e policisë dhe gjithë qeverisë. Rezultatet kanë dalë para atyre ngjarjeve. Tregojnë vjeshtën e 2020 se si e përcakton publiku punën e bërë nga policia”, deklaroi Çuçi.
Në fakt ky ministër duhet dëgjuar, sepse edhe për çështjen e sigurisë ushqimore deklaroi në mënyrë “spektakolare” se gjalpi i lopëve zvicerane të vdes nga yndyra e tepërt, ndërsa vaji i palmës që përdorej në produktet ushqimore në Shqipëri nuk ishte i dëmshëm.
Ky ministër ia ka marrë dorën shfaqjeve, pasi shihej në çdo serë të mundshme duke provuar domate e kastravecë, por pa pyetur se fermërët shqiptarë, pikërisht për shkak të strategjive malinje në bujqësi, detyrohen ti hedhin produktet. Ndërsa në disa zona të tjera janë në mëshirë të natyrës, ku luten për një të rënë shi, pasi qeveria qëndrore apo lokale nuk ka investuar në pastrimin e kanaleve vaditëse. Dhe kur qindra mijëra hektarë tokë qëndronin djerr të mbuluara nga ferrat, ministri i atëhershëm i Bujqësisë Bledi Çuçi, organizonte panaire dhe evente me nismën: “Shqipëria punon tokën”.
Tashmë ka marrë detyrën e Ministrit të Brendshëm dhe e sigurt është se spektakli nuk do të mungojë, duke shfaqur sondazhe apo deklarata mediatike dhe propagandistike se kemi një polici të papërlyer dhe me profesionalizëm të lartë.
Është po ajo polici që pikërisht në ditën kur Çuçi zuri për herë të parë kolltukun e Ministrit të Brendshëm u dhunuan protestues të “Aleancës për Mbrojtjen e Tetarit”. Për këtë “spektakël” para portës së ministrisë, Çuçi nuk gjeti kohë të shprehej, por u cilësua një “punë ritinë” e strukturave të rendit.
