Me 97 vota pro, Kuvendi ka miratuar 2 ministrat e rinj, atë të Brendshme, Bledi Çuçi dhe ministren e Ekonomisë, Milva Ekonomi.
Votat që iu dhanë emërimit të ministrave të rinj, kalojnë ato që zyrtarisht PS zotëron në Kuvend, madje janë të mjaftueshme edhe për ndryshime Kushtetuese, nëse Kryeministrit Edi Rama, do t´i duheshin.
Pa asnjë mëdyshje, deputetët kanë ngritur kartonat, pasi më parë Presidenti kishte dekretuar dy emërimet e reja. Gjithçka ka ndodhur brenda pak orësh, ndoshta duke vendosur një rekord, përsa i takon kohës nga momenti që Edi Rama publikoi emrat e dy ministrave të rinj, te votimi i tyre në Kuvend.
Presidenti i Republikës nxorri dekretet brenda disa minutash nga momenti që emrat iu propozuan zyrtarisht, ndërsa PS nxitoi t´i kalonte në seancë plenare emërimet e reja, pa humbur asnjë minut kohë.
