Shkëlqim Ganaj, kreu i ILDKPI-së, nuk do të rikandidojë për një tjetër mandat në krye të këtij institucioni, ndërsa Kuvendi pritet të votojë drejtuesin e ri, në muajin janar.
Raportohet se deri më tani janë 6 kandidatë që kanë shfaqur interesin për të garuar për kreun e ILDKPI-së, institucion që ka si detyrë kontrollin e pasurive zyrtarëve dhe politikanëve.
Mandati i kreut të ILDKPI-së është 7 vjeçar, ndërsa ai zgjidhet me shumicë votash në Parlament, përmes dy raundeve.
Për këtë pozicion garojnë Evgjeni Bashari, e cila aktualisht është Sekretare e Përgjithshme e Inspektoratit.
Eridjan Salianji, ish zv-ministër i Drejtësie në qeverinë socialiste, dhe përfaqësuesi zyrtar i PS-së në KQZ, është një tjetër emër që synon drejtimin e ILDKPI.
Gjithashtu në garë është edhe ish-kryetarja e KQZ-së, Lefterie Lleshi, e cila aktualisht është drejtoreshë në Kuvendin e Shqipërisë.
Tre kandidatët e tjerë janë Evis Fico, Helena Papa dhe Dhimitrulla Spiro.
Për kreun e ri të ILDKP-së Kuvendi zhvillon dy votime. I pari synon një konsensus me opozitën, për shkak se duhen 84 vota.
Nëse nuk arrihet konsensusi, atëherë kandidati në votimin e dytë duhet të marrë 71 vota për të marrë detyrën e kreut të ILDKPI-së.
