“Mjaft është mjaft, kupa është mbushur dhe është derdhur”, u shpreh kreu demokrat Lulzim Basha, ndërsa tha nëse ka një arsye sepse revolta popullore po tregohet e përmbajtur është se ka një shpresë që me 25 prill, së bashku do e largojmë atë.
Basha tha se Shqipëria nuk e përballon qoftë edhe 1 ditë pas 25 prillit këtë regjim, ndërsa shtoi se vetëm largimi i tij është zgjidhja dhe është hapi i parë i daljes nga kriza ku ai ka zhytur vendin.
Kreu demokrat tha se Edi Rama, pasi dështoi në manipulimin e vrasjes së 25-vjeçarit Klodian Rasha nga efektivi i policisë, për të shpëtuar lëkurën e tij, shiti Sandër Lleshaj, i cili u largua nga posti i ministrit të Brendshëm.
“Nuk do e largonte Sandër Lleshajn, nëse zemërimi dhe revolta qytetare nuk do të derdhej poshtë dritareve të zyrës së tij. Kur e pa se nuk mund të manipulonte dot ngjarjen, shiti Lleshajn.
Për tre ditë nuk foli, ndërsa sot shkon ditë për ditë në familjen e Klodian Rashës.
Ato komunikatat e policisë nuk dalin pa firmën e Drejtorit të Përgjithshëm të Policisë. Fajësoi viktimën për të shpëtuar ekzekutorin. Rama nuk reflektoi, thjesht po përpiqet të shpëtojë”, tha Basha.
