Kryeministrit Edi Rama duket se nuk i del e keqja me revoltën qytetare pas vrasjes së 25 vjeçarit Klodian Rama nga një efektiv policie.
Pasi i krahasoi protestuesit me terroristët e Boko Haram, sot Rama shkoi edhe më tej, kur tha se ato që përdorim të miturit në protesta janë kriminelë.
Madje, Rama u tregua kritik edhe ndaj personazheve publike që nuk kanë ngritur zërin për atë që ai e quajti abuzim me të miturit.
Sipas kreut të qeverisë, pjesëmarrja e të miturve në protesta, është një turp i pashoq ndërsa shtoi se nxitja e tyre për dhunë dhe trazira është “shitur” si shpërthim i një zemërate popullore.
“Mendoj që është fatkeqësi e madhe që njerëz me eksperiencë, me prani publike. Shfaqin opinionet, të jenë kaq të pandjeshëm, kaq të ndërkryer, ndaj qeverisë dhe kaq të mbushur me një ndjenjë hakmarrjeje, saqë të mos e ngrënë zërin për një fakt tmerrësisht të trishtueshëm që ka ndodhur këto ditë në Shqipëri, abuzimi me të miturit.
Dhe ta interpretosh, këtë shfaqje abuzimi, si shpërthimin e një zemërate popullore, revolte gjenuine që vjen nga një frustrim i brendshëm, i shoqërisë, do të thotë që duhet të ndjehemi të alarmuar.
Është përtej skandalozes, turp i pashoq. T’i riabuzojnë të miturit, duke i përdorur si argument për të vazhduar të pikturojnë një panoramë revolucioni që kanë kohë që e nxisin dhe e presin. Rënie në një nivel që nga pikëpamja humane është katastrofë. Ata që janë pas tyre janë kriminelë”, tha Rama.
Në fakt, personazhet që Rama duket se i drejtohet, e shprehën mendimin e tyre, duke u ardhur më shumë keq për një pemë të dëmtuar, apo një tabelë të rrëzuar, sesa për vrasjen e një 25-vjeçari, apo dhunën policore që efektivët e drejtuar prej Ardi Veliut, ushtruan edhe ndaj të miturve.
