Policia e drejtuar nga Ardi Veliu është kujtuar sot mbi masat që duhet të zbatohen lidhur me pandeminë e Covid-19, ndërsa shkon edhe më tej kur paralajmëron një mbyllje përtej kufinjve të deritanishëm.
Nuk dihet nëse nga dita e sotme, Policia e Veliut ka marrë edhe rolin e Komitetit teknik të Ekspertëve, që të paktën kanë propozuar masat e deritanishme lidhur me pandeminë.
“Në mënyrë që të mos kalojmë në një etapë tjetër të një mbylljeje përtej kufijve të deritanishëm, nga të gjitha institucionet që kanë detyrime, të vazhdohet me seriozitet maksimal zbatimi i Aktit Normativ për zbutjen e efekteve të pandemisë”, thuhet në reagimin e Policisë.
Ndërkohë që kujtohen për respektimin e masave për parandalimin e përhapjes së Covid-19, ku një prej tyre është edhe mbajtja e distancës, policia nuk jep sqarime nëse këto masa po i zbatojnë në komisaritet ku mbahen prej ditësh të ndaluar me dhjetra të rinj protestues.
Prej ditësh po denoncohen rastet kur brenda një qelie në komisariate mbahen 10 apo 15 persona, pa asnjë respektim distance, madje duke mos i dhënë mundësi as të kontaktojnë me familjarë apo avokatët e tyre.
E ndërsa kërkohet zbatimi i masave nga qytetarët, duket se vetë policia e Veliut nuk po respekton asnjë masë, jo vetëm në ndalimet apo shoqërimet, por edhe në mjediset e komisariateve ku po mbajnë protestuesit.
“Bëjmë apel të mbahen parasysh nga të gjithë, kërkesat e akteve që i përcaktojnë masat shtrënguese për:
Ndalimin e grumbullimeve me më shumë se 10 persona në vende të mbyllura apo të hapura, konferenca, tubime, mbledhje partiake, ceremoni festive etj. Mbajtjen e detyruar të barrierave mbrojtëse (maska), në ambientet jashtë shtëpisë;
Ruajtjen e distancimit fizik gjatë veprimtarisë së përditshme;
Zbatimin e masave nga administrata publike dhe në automjetet e transportit publik;
Ndalimin e muzikës pas orës 20:00;
Ndalimin e aktivitetit të bareve, lokaleve, restoranteve e ‘fast food’ pas orës 22:00 deri në orën 06:00;
Kufizimin e lëvizjes së popullatës nga ora 22:00 deri në orën 06:00;
Zbatimin e protokolleve në institucionet arsimore, në të cilat vazhdon kryerja e mësimit;
Marrjen e masave administrative dhe atyre penale në rast të shkeljeve dhe mos-zbatimit të masave të veçanta në periudhën e pandemisë së COVID-19”, thuhet në njoftimin e policisë së Veliut.
