Avokatin Altin Goxhaj nuk e kanë lejuar sot që të hyjë në ambientet e Gjykatës së Tiranës, ku do të jepet masa e sigurisë për personat e arrestuar në protestat katërditore pas vrasjes së Klodian Rasha.
Goxhaj thotë se Policia që është e vendosur në hyrje të Gjykatës nuk e lejon që të takojë dy klientët e tij, me qëllime tërësisht politike. Avokati shprehet se karta që ai ka e mundëson që të hyjë në çdo rast në Gjykatë, siç ka ndodhur me mbrojtësit e tjerë.
“Nderim Kurti dhe Andrea Bregu janë dy klientët që duhet të takoj unë, i vendosin avokatë që duan vetë në mënyrë që të manipulojnë dëshmitë e tyre. Po pa Altin Goxhaj i thonë jo ti kalo këtej, ky tipi këtu është si militant sa herë që më shoqërojnë mua.
Këta se kanë haberin fare, kush do më thërrasë mua, nga e di gjyqtari emrin tim. Dy klientët e mi i kanë rrëmbyer vetëm se mbanin kapelen MAGA (Make Amerika great again). Më kanë sjellë sms që duan të jem avokati i tyre. Për herë të parë në 30 vite, të paraburgosurve nuk u lejohet që tiu çojnë ushqime”, u shpreh Goxhaj.
Avokati shton më tej se asnjë prej personave të ndaluar nuk u është lejuar që të telefonojnë familjarët e tyre. Gjatë ditës së sotme pritet që të jepet masa e sigurisë për më shumë se 50 të ndaluar gjatë këtyre katër ditëve.
