Sa kontribuon shteti për futbollin dhe sa kontribuon futbolli në ekonominë shtetërore çdo vit? Kjo është një pyetje që është përsëritur shumë shpesh në muajt e fundit në Shqipëri dhe që ka qenë ndoshta një nga kolonat më të forta ku mbështetej bojkoti i Ligës Profesioniste pasi argumentohej se kontributi ishte i madh dhe klubet nuk merrnin mbrapsht nga shteti atë që investonin.
Por shifrat që FSHF publikon në këtë drejtim, duken të pabesueshme. Ose më saktësisht ato që nuk publikon në vendin tonë dhe ia dërgon UEFA-s që kjo e fundit t’i bëjë publike.
Sipas institucionit që drejton këtë sport në vendin tonë, futbolli amator në Shqipëri, pra jo ai profesionist ku janë klubet e Kategorisë Superiore dhe të Kategorisë së Parë, kontribuon me 45 milionë euro në vit në ekonominë shqiptare. Nuk dihet se mbi çfarë bazash statistikore është arritur një përfundim i tille, për më tepër në një vit si ky aktual ku pandemia ka gjunjëzuar ekonominë. Por kjo është shifra që FSHF ka dorëzuar në UEFA në një studim që teorikisht duhej ta kishte bërë publik.
UEFA ka publikuar një artikull së fundmi rreth kësaj teme dhe sipas saj, tre Federata të ndryshme kanë bërë publik në ditët e para të dhjetorit studimet e tyre. Një prej këtyre federatave është edhe FSHF e cila ka raportuar se futbolli amator shqiptar sjell çdo vit 45 milionë euro përfitime direkte apo indirekte (mirëqënia sociale, shmangia e sëmundjeve, etj) për ekonominë në vendin tonë. Një raport që nuk është publikuar absolutisht nga institucioni i futbollit në vendin tonë, por që ka dërguar të dhënat e saj në zyrat e UEFA-s, me këtë të fundit që i ka publikuar më pas si të mirëqena. /vipsport.al/
