Gjatë pasdites së të mërkurës janë zhvilluar një seri protestash në qytetet kryesore të vendit, ndërsa qytetarët shprehën revoltën e tyre lidhur me vrasjen e 25-vjeçarit Klodian Rasha nga një oficer policie.
Në Tiranë disa qindra qytetarë protestuan për më shumë se 4 orë në aksin mes Ministrisë së Brendshme dhe Kryeministrisë, ndërsa policia përdori gazin lotsjellës për shpërndarjen e protestuesve.
Gjithashtu u protestua në Durrës, Gjirokastër, Lushnje, Fier, Vlorë, Kukës, Shkodër.
Por protesta më e veçantë është zhvilluar në Elbasan, ku një fëmijë, jo më shumë se 10 vjeç, është shfaqur para Drejtorisë së Policisë në Elbasan me një pankartë në duar.
“S’dua të kem frikë nga policia”, shkruhej në pankartën që mbante në dorë fëmija, i cili duket se ka shprehur revoltën e tij për vrasjen e të riut Klodian Rasha.
