Pas shortit, ku skuadrat njohën rivalët në rrugën drejt Botërorit 2022, tashmë vjen edhe njoftimi i papritur.
Përfaqësuesja e Katarit, vendi organizator i evenimentit, do të luajë në kualifikueset europiane. Lajmi është publikuar nga britanikja “The Independent”, sipas së cilës skuadra arabe do të përfshihet në një prej grupeve me pesë skuadra. Qëllimi është që Katari, si skuadër e kualifikuar direkt në Kupën e Botës, të ketë mundësi të zhvillojë ndeshje përgatitore të nivelit të lartë, për të qenë gati për fazën finale të turneut.
Përfaqësuesja modeste do të luajë në Grupin A, së bashku me Portugalinë, Irlandën, Serbinë, Azerbajxhanin dhe Luksemburgun. Ky është edhe grupi i vetëm ku nuk ndodhet asnjë prej skuadrave finaliste të Ligës së Kombeve.
Vendimi që Katari të luajë kundër skuadrave europiane, u mor pas negociatave të UEFA-s me Konfederatën Aziatike të Futbollit. Kjo nuk do të jetë hera e parë që Katari luan në evente, ku normalisht pjesëmarrja e tyre nuk do të ishte e lejuar. Në vitin 2019, ata luajtën në Kupën e Amerikës, turneun të cilin do të marrin pjesë me ftesë edhe në edicionin 2021.
Natyrisht, pikët që skuadrat do të grumbullojnë me rivalët arabë në kualifikuese nuk do të llogariten në renditjen finale të grupit, ndërsa ndeshjet do të luhen të gjitha në Europë./A2news
