Anëtarët e Komisionit për Punë të Jashtme dhe Diasporë në Parlamentin e Kosovës, kanë kërkuar nga Kuvendi i Shqipërisë që të miratojë një rezolutë nëpërmjet së cilës dënohet gjenocidi i shtetit serb ndaj qytetarëve shqiptarë.
Kërkesa iu bë e ditur delegacionit të Komisionit për Politikë të Jashtme të Kuvendit të Shqipërisë, i drejtuar nga Mimi Kodheli, gjatë një vizite zyrtare në Prishtinë.
Kryetarja e Komisionit për Punë të Jashtme dhe Diasporë, Time Kadrijaj, ka thënë se kur Shqipëria është e fortë, edhe Kosova do të jetë e fortë.
Në këtë kontekst, ajo ka kërkuar mbështetje më të madhe të Shqipërisë për çështjen e Kosovës, përfshirë edhe në organizatat ndërkombëtare.
Ndërkaq, Mimi Kodheli, ka thënë se vizita e delegacionit nga Shqipëria po realizohet në një kohë jo të mirë për Kosovën, duke iu referuar arrestimeve të ish- drejtuesve të UÇK-së nga Gjykata Speciale.
Ajo ka kërkuar koordinim më të madh përballë sfidave të reja, duke e pranuar faktin se Shqipëria, sikurse edhe Kosova nuk ka bërë aq sa duhet për zbardhjen e gjenocidit serb.
“Bashkë do të bëjmë shumë më shumë se sa deri dje. Kur ne jemi të ndarë, të tjerët janë shumë të fortë”, ka thënë Kodheli, duke shtuar se lufta e UÇK-së ka qenë e drejtë dhe e pastër.
