Nga Boldnews.al
(Pjesa 2)
Në pjesën e parë të investigimit faktuam se e njëjta rrugë e cila ishte ndërtim pa leje, po ribëhet nga Fondi Shqiptar i Zhvillimit.
Madje, për llogari të “Green Coast”. Firma e cila po ndërton kompleksin e vilave, fitoi edhe tenderin për rrugën, madje u mor edhe e pandehur për ndërtim pa leje.
Në tender morën pjesë 7 kompani, por u kualifikuan vetëm 2 prej tyre, Gjikuria dhe Fusha, ndërsa 5 të tjerat u skualifikuan.
Gjikuria dha ofertën prej 499736229.06 lekë, ndërsa Fusha ofertën 522129279.05 lekë, në tenderin për ndërhyrjen e integruar për përmirësimin e aksesit, shërbimeve dhe riakualifikimit urban në zonën e Plazhit Palase-Drymadhes.
Por, nuk përfundojnë këtu abuzimet me këtë tender, i cili duket se është totalisht në favor të oligarkëve.
Në afërsi të “Green Coast” është edhe një monument natyre i mbrojtur nga shteti. “Delta e Përroit të Palasës”, sipas listës nga Wikipedia është monumenti i 35-të që duhet të mbrohet në qarkun e Vlorës.
(https://sq.wikipedia.org/wiki/Lista_e_monumenteve_natyrore_n%C3%AB_Shqip%C3%ABri#Rrethi_Vlor%C3%AB)
Duke shfletuar ligjin për zonat e mbrojtura, ndalohet rreptësisht ndërhyrja apo shkatërrimi i Monumenteve të Natyrës. Madje, ligji përcakton se ka edhe një zonë buferike nga 50 deri në 200 metra ku nuk duhet të ndërhyhet, të bëhen punime apo edhe vepra të tjera. Gjithkush e mban mend debatin për Kanionin e Holtës në Gramsh, ku po ndërtohej HEC në hyrje të tij.
Apo edhe HEC-et në kanionin e Llëngës, si dhe në zonat e Mbrojtura në Valbonë apo Shishtavec. Por, le të analizojmë se çfarë ka ndodhur apo do të ndodhë në “Deltën e Përroit të Palasës”.
Në dokumentet e tenderit që ka shpallur FSHZH, ku pritet edhe fituesi, duket mjaft qartë se Fondi ka “kafshuar” një pjesë të mirë të këtij Monumenti të Natyrës. FSHZH ka zhvendosur me dia metra gjurmën e rrugës, duke e futur në brendësi të Deltës, pa “iu dridhur aspak qerpiku” dhe duke shkelur haptazi ligjin për Zonat e Mbrojtura.
Pamja e mësipërme është mjaft e qartë! Një pjesë e mirë e rrugës është brenda kësaj Delte, duke shkelur haptazi ligjin. Por, sikur të mos mjaftonte gjurma e rrugës brenda Deltës, Fondi Shqiptar i Zhvillimit ka përcaktuar që brenda këtij Monumenti të bëjë edhe një parkim gjigant. Shikoni dokumentet e tenderit dhe gjumën e parkimit, ku rezulton mjaft qartë se është brenda Përroit.
Natyrisht, ajo që bie në sy është; Kush e dha lejen mjedisore për këtë projekt? Kush e dha aprovimin për ndërtimin e rrugës dhe parkimin? A ka marrë leje FSHZH te Administrata e Zonave të Mbrojtura për këtë projekt? Natyrisht, nëse do të pyeste cilindo specialist mjedisor, përgjigja do të ishte totalisht negative.
Skandali 5 mln USD/ FSHZH ribën rrugën “pa leje” të kompleksit “Green Coast” në Palasë
Nëse bëjmë një kërkim të thjeshtë në internet, rezulton se firma “Gjikuria”, ajo që bëri rrugën pa leje dhe po ndërton “Green Coast”, është gjobitur për shkatërrim të Monumentit të Natyrës “Delta e Përroit të Palasës”.
Në vitin 2018, një inspektor i ADZM Vlorë i tha mediave se “Delta e Përroit të Palasës është monument natyre, e shpallur në datën 20.10.2002. Nuk lejohet që të bëhen gërmime, pa lejet e organeve përkatëse. Gërmimet janë të ndaluara”. Por, në vitin 2015, më 25 korrik, është proceduar kundrejt firmës “Gjikuria” për gërmime në deltën e përroit të Palasës. “Është bërë kallëzim penal për subjektin në fjalë. Ne deri më sot nuk kemi marrë asnjë informacion nga Prokuroria e Vlorës, deri ku ka shkuar hetimi” ka thënë ai.
PS: Në pjesën e tretë do të faktojmë se tenderi 5 milionë USD i FSHZH është paracaktuar. Pra, fitues pritet të shpallet “Gjikuria”, e cila bëri rrugën pa leje, ndërhyri në Deltën e Palasës dhe po ndërton kompleksin “Green Coast”. Madje, sipas dokumenteve të tenderit, FSHZH po i bën “dhuratë” oligarkut edhe një mol privat! Të gjitha me taksat tona.
