Nga Boldnews.al
Kryeministri dhe “kryevaksinologu” Edi Rama, ndodhet në Amerikë për të siguruar sipas tij vaksinën anti-covid. Këtë e konfirmon edhe “kryelaboranti botëror” dhe kryebashkiaku i Tiranës Erion Veliaj…
Me një shikim drejt e në sy, Rama të hipnotizon dhe më pas prodhuesit e vaksinës anti-covid në SHBA do nisin injeksione për gjithë shqiptarët, e madje disa edhe mund të teprojnë, ku nuk përjashtohet mundësia që Rama ti dërgojë “tepricat” në Gjermani dhe vendet e tjera të Evropës, për bamirësi… Ata nuk kanë dhe nuk dinë as ta shohin prodhuesin në sy, e as të sigurojnë kushtet e duhura për ruajtjen dhe shpërndarjen e vaksinës.
Kushdo që është “skeptik” nga ky premtim i Ramës, le të lexojë statusin e tij para se të merrte avionin dhe kryente ndalesën në SHBA. “Sigurimi i vaksinës sa më parë është një prioritet i luftës sonë kundër Armikut të Padukshëm dhe s’do lemë gur pa luajtur që vaksina të fillojë të vijë sa më parë në Shqipëri! Kontakti sy më sy me prodhuesit e vaksinës i shërben këtij qëllimi. Rrugës për në Shtetet e Bashkuara”-deklaroi Rama.
Kur e gjithë bota e zhvilluar, përfshi edhe liderët e saj janë në ankth për sigurimin e vaksinës efikase kundër coronavirusit, kryeministri ynë e “zgjidh” këtë çështje duke të parë në sy… Propaganda nuk njeh kufij, por edhe nëse ka një handek që nuk kalohet, ne kemi Erion Veliajn që të jep “shpresë” të madhe…
“Kryeministri nuk erdhi dot sot sepse është me një mision në Amerikë për të diskutuar me ata që e prodhojnë vaksinën, që të sigurohemi që jemi ndër të parët që e marrim”, u shpreh Veliaj teksa shihte një banesë të ndërtuar në fshatin Bërzhitë nga pasojat e tërmetit të vitit të kaluar. Ia tha në sy këtë disa fermëreve dhe nëpunësve të Rilindjes që u mrekulluan nga lëvizjet e çdo guri që Rama sheh…
Jemi në një absurd të madh, kur propaganda e qeverisë i bën jehonë udhëtimit me avion të Ramës, realiteti është pak të quhet i hidhur në vend. Me dhjetëra autoambulanca të rrënuara qëndrojnë në oborrin e spitalit “Shefqet Ndroqi”, i njohur si Sanatoriumi në Tiranë. Nuk ka vende më në dy spitalet covid dhe paciantët qëndrojnë me orë të tëra, në pritje që një vend të lirohet.
Nëse do i besonim propagandës, atëherë vaksinën jo vetëm e kemi siguruar, por ai kontakt sy më sy mes Ramës dhe prodhuesit amerikan, do na shpëtojë jetët, ku edhe frymën që marrim e kemi “dhuratë” nga Rama ynë. Por edhe sikur prodhuesi amerikan të mendojë që një pjesë të vaksinave t’ia dhurojë Shqipërisë, atëherë ka një tjetër problem madhor. Së pari vaksinat që po prodhohen në Amerikë dhe Gjermani, nga dy kompani moderne dhe të njohura, janë shumë specifike.
Ato ruhen në një temperaturë nga -65 deri në -80 gradë. Vendi ynë nuk ka asnjë kapacitet që ata ta ruajë e aq më shumë shpërndajë në popullsi. Në vendin tonë vaksinat ende qëndrojnë në disa termues të vjetëruar. Për qeverinë nuk është koha të sigurohet vaksina moderne kundër covid-19, por të injektohet në mendjen e qytetarëve një “vaksinë” haluçinative siç është ajo e propagandës.
