Hije skandali po vërtiten mbi organet e Policisë, Doganës dhe Gjykatës së Durrësit lidhur me sekuestrimin e 294 mijë eurove kontrabandë, të zbuluara në kamionë në Doganën e Durrësit më 13 nëntor 2020. Gjatë rinumërimit të kësaj sasie të konsiderueshme parash në Gjykatën e Durrësit, ka rezultuar se mungonin 30 mijë euro!
Këtë fakt e ka vënë në dukje ish-Kryeministri Sali Berisha, mbështetur në denoncimin e një qytetari. Berisha ka akuzuar struktura kriminale të Policisë si të përfshira në fshehjen e këtij krimi.
“Vidhen nga dosja, 30 000 euro të konfiskuara! Narkopolicia fsheh krimin. Lexoni mesazhin e qytetarit dixhital,” shkruan Berisha sot.
Çfarë denoncon qytetari?
“Përshëndetje Doktor, – shkruan ai. – Dua të denoncoj një fshehje krimi që ndodh me narkopolicët dhe narkodoganierët. E mbani mend sekuestrimin e 294.000 eurove në Portin e Durrësit, që Policia e bëri si një operacion të suksesshëm në bashkëpunim me doganën Durrës rreth 2 javë më parë?! Epo kur materialet kanë shkuar në Gjykatë dhe është bërë rinumërimi, rezultoi që mungojnë rreth 30.000 euro, të cilat janë marrë nga narko-policët e narkodoganierët. Policia fshsh ngjarjen. Ju lutem anonim, Doktor!”
Operacioni
Më 13 nëntor 2020, Policia njoftoi: Shërbimet e Policisë Kufitare, në zbatim të masave për parandalimin dhe goditjen e krimeve ndërkufitare në bashkëpunim me strukturat doganore, kanë intensifikuar kontrrollet si në dalje, ashtu dhe në hyrje, në Portin e Durrësit.
Si rezultat i kontrolleve të shtuara bazuar dhe në analizën e riskut të bërë nga shërbimet e Policisë në PKK Durrës në bashkëpunim me strukturat doganore, janë kaluar në vijën e dytë për kontrroll të imtësishëm 2 mjete tip kamion, të cilët transportonin mjete Itali-Shqipëri, me drejtues shtetasit F. M., dhe A. L.
Specialistët për Hetimin e Krimit Ekonomik dhe Financiar në DVP, shërbimet e Policisë Kufitare dhe strukturat doganore, nën drejtimin e Prokurorisë së Rrethit Gjyqësor Durrës, gjatë kontrollit në automjetin me drejtues shtetasin F. M., gjetën të fshehura në pjesë të ndryshme të mjetit një sasi vlere monetare prej 282 265 eurosh.
Në vijim të veprimeve u arrestua në flagrancë shtetasi F. M., 29 vjeç, banues në Lezhë, për veprën penale “Mosdeklarimi i të hollave dhe sendeve me vlerë në kufi”.
Shërbimet e Policisë kanë vijuar me kontrollin e automjetit tjetër me drejtues shtetasin A. L., ku në çantën personale të tij, u gjetën dhe sekuestruan në cilësinë e provës materiale, një sasi vlere monetare prej 11 765 eurosh.
Specialistët për Hetimin e Krimit Ekonomik dhe Financiar, proceduan penalisht shtetasin A. L., 34 vjeç, banues në Lushnjë, për veprën penale “Mosdeklarimi i të hollave dhe sendeve me vlerë në kufi”.
Po në vijim të veprimeve u bë shpallja në kërkim e shtetasit E. J., 36 vjeç, (pronari i firmës që bënte transportin e mjeteve), për veprën penale “Pastrimi i produkteve të veprës penale ose veprimtarisë kriminale”. Materialet i kaluan Prokurorisë së Rrethit Gjyqësor Durrës, për veprime të mëtejshme.”
