Një 29-vjeçar shqiptar u dënua me 3 vite burg në Britaninë e Madhe, pasi u kap në një banesë të mbushur me kanabis.Pas mbarimit të dënimit, ai deportohet automatikisht në Shqipëri.
Gjovalin Vuksani, 29 vjeç, u kap në qytetin e Hull. Kanabisi i mbjellë në banesë kapte vlerën e 750 mijë sterlinave, raportojnë mediat britanike.
Përpara gjykatës, avokati tha se familja kishte paguar që Vuksani të mbërrinte ilegalisht në Angli. Por në Angli ai i detyrua që të punonte si ‘kopshtar’ kanabisi për të shlyer borxhin.
Oficerët e policisë u lajmëruan nga banorët e zonës, që thanë se kishin nuhatur erën e pazakontë. Pasi u futën në ndërtesë, policia gjeti katër dhoma të mbushura plot me bimë kanabisi.
Kur u pyet nga policia, Vuksani tha se duhej të shlyente borxhin prej 16 mijë sterlinash që kishte marrë për të ardhur ilegalisht në Angli.
