E ndërsa në Shqipëri, duhet të presësh me ditë e javë që të realizosh një testim falas për koronavirusin, në Gjermani autoritetet u detyruan të angazhojnë policinë për të mbajtur nën mbikqyrje një familje të madhe me origjinë shqiptarësh nga Kosova, e cila nuk pranoi të testohej.
Mediat gjermane raportojnë se familja me vendbanim në Luneburg të Gjermanisë veriore, refuzoi testimin, ndërsa disa pjesëtarë të saj, rezultuan pozitivë ndaj Covid-19.
Familja shumë e madhe, e përbërë nga dhjetëra anëtarë, është e njohur në Rotenburg.
Autoritetet gjermane janë detyruar të ruajnë karantinën, duke angazhuar një kompani të rojesh, për të mos lejuar anëtarët e shumtë të familjes për të mos dalë nga izolimi.
Pas disa rasteve pozitive me COVID-19 në familjen kosovare, departamenti i shëndetësisë urdhëroi teste të detyrueshme për të gjithë, një javë më parë.
Meqenëse disa anëtarë nuk ishin bashkëpunues, autoritetet kërkuan mbështetje nga policia, duke përfshirë rreth 20 oficerë nga policia e Luneburgut.
Autoritetet kontrolluan katër shtëpi të familjes, duke i detyruar anëtarët t’i nënshtrohen testimit.
Gjatë aksionit, një i ri u përpoq të ikte, madje dëshmitarët okularë deklaruan se u hodh nga kati i parë.
Që atëherë shtëpia ruhet nga rojet e sigurisë. Një shërbim i sigurisë ka monitoruar daljet nga ndërtesa për tetë ditë rresht.
“BILD” foli me një anëtar të familjes, një grua rreth 45 vjeç, e cila pohoi se të gjithë ne e kemi koronavirusin, vetëm ne të rriturit vuajmë, fëmijët po shkojnë mirë.
“Unë u mjekova në banesë për dhjetë ditë, burrit tim iu desh të shkonte në spital”, shprehet ajo.
Të martën, zona ku jeton familja shqiptare raportoi 87 persona të infektuar, nga kjo 30 të infektuar i përkasin familjes së madhe nga Kosova.
BILD raporton se koston e shpenzimeve për ta mbikëqyrur familjen rojet e sigurisë e mbajnë mbi vete taksapaguesit gjermanë.
