“Kisha më shumë frikë për familjen sesa për veten”, Grosjean tregon momentet e tmerrit mes flakëve

Romain Grosjean, piloti i cili shpëtoi për mrekulli nga një aksident i tmerrshëm në Çmimin e Madh të Bahreinit ditën e dielë, dha intervistën e tij të parë nga spitali, ku po kurohet për disa djegie në duar dhe këmbë.

Për “TF1”, francezi i skuadrës Haas, tregoi momentet që përjetoi brenda makinës që mori flakë pas përplasjes me muret mbrojtëse.

“Po shikoja vetëm ngjyrë portokalli dhe flakë kudo. M’u kujtua aksidenti i Niki Laudës dhe nuk doja që të përfundonte gjithçka aty. Dola për hir të fëmijëve të mi. Kisha më shumë frikë për familjen time dhe për prindërit e mi sesa për veten”, u shpreh Grosjean.

“E dija që duart i kisha djegur, por mendova se kisha thyer edhe këmbën. Pashë vdekjen me sy dhe e dija shumë mirë që mund ta shmangia vetëm po të dilja vetë nga makina. Nuk i humba ndjenjat. Munda të hiqja rripin e sigurisë dhe timoni nuk ishte fare aty, do jetë shkëputur gjatë përplasjes. As në Hollivud nuk është parë një aksident i tillë. Qëndrova 28 sekonda në flakë, por m’u duk më shumë se aq sepse tentova 3 herë të dilja nga makina”, shtoi francezi i Haas.

LEXO EDHE  Kupa e Shqipërisë për moshat: Derbi dhe Tirana-Laçi, zbulohen çiftet e çerekfinaleve

Sipas 34-vjeçarit, ai i mbijetoi aksidentit të frikshëm vetëm sepse të gjitha rrethanat shkuan në favor të tij: “Ishte një kombinim rrethanash të favorshme. Duke parë se çfarë aksidenti pësova, nuk ankohem fare për plagët që kam në duar. Dukem keq, por nuk jam aq rëndë sepse mund t’i lëviz të gjitha gishtat”.