Një skandal i vërtetë ka ndodhur sot në spitalin “Shefqet Ndroqi”, i kthyer prej muajsh në një spital “Covid2”, ku ansambli i këngëve dhe valleve popullore nisi një koncert, ndërsa stafet mjekësore nxituan të dalin në ballkone duke kërcyer e kënduar.
Një moment aspak i përshtatshëm, pavarësisht se mund të jetë menduar si një mënyrë për ti dhënë mjekëve apo infermierëve zemër, mbështetje apo qoftë edhe minuta qetësie në përballjen e përditshme me koronavirusin.
Ndërkohë që nga Ansambli jepej koncert, ndoshta për të treguar se jeta vazhdon, në dhomat e spitalit padiskutim ka pasur pacientë që luftojnë me vdekjen.
Një prej tyre ishte edhe një prej pedagogeve të njohura, e cila fatkeqësisht humbi jetën, po sot, ndoshta pak momente pas videove që qarkullonin në rrjet dhe media, ku një pjesë e stafit mjekësor, u shfaq në ballkonet e dhomave të spitalit.
Në të njëjtën kohë, kolegë të tyre, insistonin në takimet online me Presidentin për marrjen e masave, për shtimin e testimeve, për gjetjen e zgjidhjeve në përballimin e pandemisë, ndërsa dhanë alarmin se pacientët nuk mund të trajtohen më në ambulanca.
Ndoshta pa dashur bashkohen tre panorama: një ajo e asaj pjese të stafit që nuk i rezistoi tingujve të muzikës, një ajo e pacientëve në gjendje të rëndë dhe një tjetër e atyre mjekëve, që i shqetëson ajo që mund të vijë më pas, kolapsimi total i sistemit.
Ende nuk dihet se kush ishte “mendjendrituri” që mendoi të çonte Ansamblin të jepte një koncert në një prej spitaleve ku çdo ditë regjistrohen humbje jetësh, ku familjarët presin me dorë në zemër një informacion për të afërmit e tyre të shtruar dhe të tjerë që lotojnë për humbjet që pësojnë.
Jeta vërtet vazhdon, por ndoshta duhet më shumë respekt për ata që ndodhen sot në gjendje kritike, jo për fajin e tyre, ndoshta as për faj të atyre bluzave të bardha, por të një sistemi të tërë që prodhon show dhe njerëzit po i konsideron thjesht numra.
