Trajneri i Partiznait, Ilir Daja ka folur një ditë para ndeshjes me Apoloninë. Të kuqtë do të luajnë në transfertë nesër në 13:45, me Dajën që kërkon vëmendje te fierakët pasi nuk ka skuadër të lehtë.
Kryeqytetasi nuk ka dashur të shpërqëndrojë skuadrën nga dueli i radhës, me Dajën që tregon edhe mungesat. Veç problemeve të Cordeiro, është edhe Broja ai që shqetëson Demat.
“Apoloninë e shohim si çdo sfidë të radhës, pasi në këto tre javë të parë është konfirmuar se nuk ka ndeshje të lehta. Ekipet janë aty-aty me paraqitjet e tyre dhe mendojmë se Apolonia ka një ekip me djem të rinj që duan të promovohen. Ata janë të motivuar në çdo ndeshje dhe në të njëjtën shkallë motivimi duhet të jemi edhe ne, sepse në fund të fundit çdo ndeshje është e barabartë me tre pike.”
Mungesat? Nuk duhet të fokusohemi te mungesat, pasi me këtë kampionat të ngjeshur do e kemi këtë problematikë gjatë gjithë kohës, jo vetëm ne, por edhe rivalët. Ne nuk jemi të plotë, por ata që janë në dispozicion besoj se bëjnë maksimumin për të minimizuar mungesat që kemi. Broja deri në seancën e djeshme është stërvitur i diferencuar. Nëse nuk do jetë as sot, nuk do ta sakrifikojmë për nesër. Më mirë të mungojë nesër se në vazhdimësi.
Rivalët dhe derbi me Tiranën? Ne kemi rival vetëm Apoloninë, fokusohemi vetëm te ndeshja e nesërme. Më pas do shohim kush janë rivalë më të fortë, apo jo të fortë. E thashë që në këtë fillim të kampionatit nuk është se ndonjë diferencë të madhe. Derbi? Jemi të fokusuar te ndeshja e nesërme, masje as për Skënderbeun që luajmë të dielën s’e mendojmë. Duam të marrim maksimumin në ndeshjen e radhës.
Pres motivim të skuadrës në vazhdim dhe konsolidim më të mirë në drejtim të finalizimit. Me rastet e krijuara duhet të shkojmë te goli, që të jep qetësi psikologjike. Dihet që kush shënon i pari ka më shumë shanse të fitojë”, tha Daja.
