Rregullat e vendosura nga Komiteti Teknik i Ekspertëve për të mos lejuar aktivitete politike apo grumbullime të më shumë se 10 personave duket se i ngjajnë tashmë “Fermës së kafshëve” të Oruellit. Vetëm atje rregullat nuk janë njëlloj për të gjithë.
Fillimisht ishte ministrja e arsimit Evis Kushi, më pas deputetë të ndryshëm të PS-së publikonin takime elektorale në Facebook dhe se fundmi listës i shtohet edhe kryetari i bashkisë së Tiranës, Erion Veliaj.
Mbrëmjen e së dielës ai ka ndezur dritat e pemës së Vitit të Ri në sheshin Skënderbej, por nuk mund t’i rezistonte dëshirës për tu shfaqur sërish.
Veliaj e përcolli mesazhin me një video nga zyra, por në shesh u mbajt një koncert ku këndonin fëmijë. Nuk munguan edhe në këtë rast grumbullimet përpara podiumit. Veliaj thotë se në skenë ishin vetëm 10 fëmijë, por për t’i ndjekur ata dukshëm u mblodhën edhe më shumë.
Policia e shtetit që thotë se vëzhgon kush feston ditëlindjen dhe publikon foto në Facebook ka një rast për të hetuar, edhe pse nuk pritet të ketë gjoba. Më poshtë disa vido që “i shpëtuan” regjisë qendrore të Bashkisë./ Lapsi.al/
