Infeksionisti Tritan Kalo, i cili është një nga mjekët e spitalit Infektiv, atje ku prej muajsh kurohen pacientët me Covid-19, ka shpërthyer me një seri akuzash ndaj politikanëve.
Sipas Kalos, krimi më i madh i sistemit shëndetësor publik është politizimii tejskajshëm duke rrënuar profesionalizmin.
Mjeku nuk i kursen fjalët për politikanët duke i cilësuar si “ish brekëgrisur” që nuk ngopen me vjedhje, ndërsa nuk kursehet as me qeverinë teksa i rendit gjithçka po i bëjnë vendit.
“NUK u nginjët ende ju “ish brekëgrisur” të para 1990-ës…..Vodhët e po vidhni gjithshka që Natyra na ka dhuruar me bujari mbi dhe nën tokë…..Privatizuat, pervetësuat e keqpërdorët gjithshka që NE me djersë, gjak e sakrifica ndërtuam në 45 vite….
E detyruat gjysmën e popullatës së Shqipërisë së këndej Drinit të largohen në udhën e theqafjes së emigracionit….Në darkë përsëri ju politiqenër të PS, PD, LSI, PR, PSD, PBDNj, PDIU, PDK, PAA, LZHK, etj., uleni rreth “tavolinës së shtruar me peshk e ngjala dhe verë franceze”, për të ndarë mes jush çdo gjë që mundet ende të përftohet nga pasuritë e vendit dhe nga taksat tona, pavarësisht nga retorika televizive e përplasjeve tuaja gjatë DITËS si gjoja të qënurit tuaj parimor dhe përvuajtës për “grigjën tonë”….”, shkruan Kalo në Facebook.
Në një replikë me mjekun e njohur Tritan Kalo, ka reaguar eskperti i shëndetit publik, Erion Dasho. Ai i kujtoi Kalos, videon nga spitali Infektiv, pikërisht një ditë pas fotografive në morgun e Tiranës duke i thënë:
“Doktor, nuk janë akuzuar mjekët si fshehës të vdekjeve. Përkundrazi pati një vetë-akuzim dhe vetë-mbrojtje të pakuptimtë ditën e premte. Puna e mjekut nis dhe përfundon tek kartela e vdekjes. Plotësohet ajo me ndërgjegje mantelbardhi dhe kaq. Të uroj një ditë të mbarë!”, shkruan Dasho.
