Qeveria miratoi një ditë më pparë skemën për rimbursimin e pacientëve pozitiv me Covid-19.
Sipas ministres së Shëndetësisë, rimburimi i barnave do të nisë duke nisur nga kjo e enjte dhe do të jetë mjeku i familjes që do të vendosë për barnat që do të marrë pacienti.
“Paketa e re nga sot ka filluar të funksionojë si skemë mjekimi, në të gjitha strukturat tona të kujdesit shëndetësor. Fondi i Sigurimeve të detyrueshme të Kujdesit Shëndetësor është institucioni që do të administrojë të gjithë këtë skemë.
Udhëzuesit e trajtimit kanë pësuar rifreskime dhe do të vijojnë të rifreskohen. Mjeku i familjes do të vijojë të ketë një rol esencial në raport me mbështetjen e paketës së rimbursimit.
Duke vlerësuar formën e sëmundjes dhe indikacionet e përcaktuara në udhëzuesin e Komitetit Ekspert. Ky udhëzues që prej një muaji është shpërndarë te qendrat shëndetësore”, tha ajo.
Manastirliu u shpreh se mjeku i familjes është ai që përcakton barnat, edhe sa i përket fazës së trajtimit është mjeku i familjes që vlerëson në çfarë faze të sëmundjes është qytetari me Covid-19.
“Edhe sa i përket ekzaminimeve është sërish mjeku i familjes që përcakton kur bëhen ekzaminimet. Dhe është edhe më tej mjeku i familjes që vendos nëse qytetari duhet të referohet pranë mjekut specialist, ose duhet të telefonojë 127”, është shprehur Manastirliu.
Një ditë më parë u bënë publike edhe se sa do jetë vlera e rimbursimit.
Skema e parë e cila do të përfshijë formën e lehtë të infektimit, do të rimbursohet deri në jo më shumë se 1 650 lekë.
Skema e dytë do të përfshijë formën e mesme të infektimit, ku vlera e rimbursimit do të jetë jo më shumë se 10 900 lekë.
Vlerësimi i secilës formë do të bëhet nga mjeku i familjes.
