Nënkryetari i LSI-së, Petrit Vasili, ka reaguar ashpër ndaj gjithë tentativave që po bëhen lidhur me manipulimin e zgjedhjeve të 25 prillit.
Vasili paralajmëron ata që po merren me këto procese se do të burgosen dhe do t´u priten duart.
“Kushdo nga Rilindja në Qeveri, që do guxojë të manipulojë me Gjendjen Civile të qytetarëve, duke bërë transferime nga një qytet në tjetrin me qëllim për ti penguar të votojnë ta dijnë mirë se : DO TU PRITEN DUART DHE DO BURGOSEN”, shkruan Vasili.
Reagimi i nënkryetarit të LSI ka ardhur pas denoncimeve të shumta se qytetarëve po u ndryshohet gjendja civile. Më herët ish-deputeti Vangjel Tavo në një postim në rrjetet sociale shkruante se “e frikësuar gjer në palcë për largimin e saj të sigurt e të pashmangshëm ka kryer veprime të qëllimshme për çrregjistrimin e banorëve nga vendbanimet e tyre duke i regjistruar në qytete të tjera”.
“Emrin tim, pa asnjë kërkesë timen, e kanë hequr nga Dropulli dhe e kanë caktuar tjetërkund.
300 banorë të Dropullit i kanë çrregjistruar pa dijeninë dhe kundër dëshirës që të mos votojnë në Dropull.
Gabim njerëzor justifikohen por është i qëllimshëm me synim pengimin e votuesve kundër sektit të ligë e në largim të “Rilindjes.”
Kjo po ndodh në të gjithë vendin. Duke u justifikuar me gabim njerëzor cilitdo që ankohet u kërkohen dokumentacion për t’u rikthyer në regjistrimin e vendbanimit apo gjendjes civile. Kjo kërkon kohë dhe pengon banorët të votojnë.
Ky është një plan i qëllimshëm elektoral që duhet ndalur sa më parë. Ky është një plan i ligë, antidemokratik dhe antiligjor.
Kjo është një arsye më shumë për ta shporrur përgjithmonë këtë sekt malinj që ka shkatërruar vendin”, shkruante ish-deputeti Tavo.
