Shqipëria ka mposhtur 3-1 Kazakistanin, në ndeshjen e vlefshme për Grupin 4 të Ligës C të Kombeve.
Ndryshe nga ndeshjet e fundit, në këtë takim kombëtarja jonë ishte më kërkuese në fushën e lojës, ndërsa rastet për shënim ishin të shumta në kontrast me zhgënjimet e fundit në dy ndeshjet ndaj Lituanisë dhe ndaj Kazakistanit në transfertë.
Kuqezinjtë shënuan të parët në minutën e 16-të të ndeshjes me anë të Sokol Cikalleshit. Kavajasi u vendos mirë në zonë dhe shfrytëzoi në maksimum një krosim perfekt të Memushaj dhe i jep avantazhin kuqezinjve. Shqipëria dyfishoi shifrat shtatë minuta më vonë.
Autori i golit Ardijan Ismajli, i pari me kombëtaren për mbrojtësin dardan. 24-vjeçari përfitoi nga një grushtim i portierit mik dhe dërgoi topin në rrjetë.
Gjithsesi, euforia e skuadrës së drejtuar nga Edi Reja bëri që kundërshtarët të ngushtonin diferencat menjëherë pas festës së kuqezinjve.
Portieri Etrit Berisha kishte dalë duke festuar golin dhe kazakët përfituan. Abat Aymbetov goditi nga rreth 50 metra me topin që përfundoi në rrjetë.
Goli i sigurisë dhe që vendosi përfundimisht fatet e ndeshjes erdhi në minutën e 61-të. Amir Abrashi u pengua në zonën kundërshtare dhe ekzekutimin e mori përsipër Rey Manaj. Sulmuesi lushnjar nuk gaboi nga pika e bardhë, duke shënuar golin e qetësisë për kombëtaren e Shqipërisë.
Me këtë fitore, Shqipëria ngjitet në vendin e dytë në grupin 4 të Ligës C në kuotën e 8-të pikëve. Kryesimin e mban Bjellorusia me 10 pikë që sonte mundi 2-0 Lituaninë.
Shqipëria dhe Bjellorusia do të luajnë me njëra-tjetrën pas tre ditësh, ndeshje kjo që do të përcaktojë skuadrën që do të avancojë më tej.
