Lulzim Basha, Kryetar i PD-së, u shpreh se numri i personave të infektuar nga Covid-19 dhe personave që kanë humbur jetën është shumë herë më i lartë se ai që raportohet.
Basha tha se problemi kryesor në lidhje me pandeminë është pikërisht mungesa e testimeve.
“Nuk ka testime në masën që duhet, jemi vendi i fundit lidhur me testimet. Shifrat që raportohen nuk janë ato që janë në realitet”, tha Basha.
Sipas tij, nëse do të kishte testime, situata nuk do të ishte kjo që është sot, që pacientët janë lënë në mëshirën e fatit.
“Nuk ka njeri sot në Shqipëri që mendon se situata është nën kontroll. Sistemi është në kolaps, pacientët po lihen me orë të tëra në ambulanca, pacientët po kurohen në shtëpi dhe trajtimi i tyre kushton deri në 4200 euro, siç është Remdesiviri”, tha Basha.
Sipas tij, strategjia e Edi Ramës është të shpëtojë kush të shpëtojë dhe të vdesë kush të vdesë.
“Testimet janë më të ulëtat në Europë dhe kjo është përgjegjësia e Qeverisë. Ka raste kur përgjigjet nga tamponi jepen kur pacienti ka vdekur, ose kur është shëruar”, tha Basha.
Sipas tij, në dy spitalet Covid ka protokolle të ndryshme kurimi.
“Si ka mundësi që në dy spitale Covid1 dhe Covid2 ka protokolle të tjera? Si ka mundësi që në Covid3 ka një tjetër protokoll. Çfarë është kjo?”, tha Basha.
