Pneumologu Arian Mezini u shpreh sot në emisionin Open se paniku po i dëmton njerëzit më shumë se virusi.
Mezini tha se ajo që vërehet sot është gjendja e panikut te personat e prekur, që është shumë më e dëmshme, se edhe vetë ajo që shkakton virusi.
“Nuk po shikojmë sot format që kemi parë në mars apo prill të shfaqjes së virusit, të paktën nga skanerat. Ajo që evidentohet është temperatura, e cila për mendimin tim deri në 38 tregon atë luftën e imunitetit që bën trupi me virusin. Shqetësues është kur temperatura zgjat, pra 3-4 ditë në shifra të larta. Por mendoj se gjithçka duhet të merret me qetësi, pa panik. Personat që arrijnë të shmangin panikun, e kalojnë edhe më lehtë”, tha Mezini.
Sipas tij, ka raste kur qytetarët shqetësohen për temperaturën 37.2 ndërkohë që kjo është temperatura normale e trupit pa virus.
“Duhet të kuptoni se gripi stinor është më agrevis në disa forma të tij, por ky si virus ka atë që ka të papriturat dhe krijon panikun te njerëzit. Por 95 % e njerëzve e kalojnë shumë lehtë, kjo nuk do të thotë se duhet marrë me mendjelehtësi, pasi sa më i lartë të jetë numri i të infektuarve, aq më i lartë do të jetë numri i rasteve të rënda te personat e riskut”, tha Mezini.
Ai vuri theksin te protokollet e mjekimit, për të cilat tha se duhet të tregohet shumë kujdes.
“Antibiotikët përdoren në spitale dhe kjo shikohet sipas pacientëve, pra nga imuniteti i tyre. Amtibiotiku nuk lufton Covid, por infeksionet bakteriale që në spitale janë të shumta.
Sot në shtëpi shqiptarët kanë aparatura që masin nivelin e oksigenit në gjak, që janë kthyer si filxhanë kafeje. Shkojnë dhe zbrasin farmacitë, marrin edhe bombula oksigjeni në kushte shtëpie. Mendoj se duhet ta marrin me qetësi”, tha Mezini.