Situata e Covid-19 në Shqipëri duket se ka dalë jashtë kontrollit, ndërsa sot u raportuan 12 jetë të humbura, shifra më e lartë që prej marsit, kohë kur u evidentuan rastet e para me koronavirus në vend.
Opozita akuzon Qeverinë se nuk ka marrë masat e duhura për përballimin e pandemisë, ndërsa Kryeministri thotë të kundërtën dhe shprehet se spitalet Covid dhe stafet mjekësore janë në krye të detyrës.
Në media kanë qarkulluar denoncime të familjarëve të të prekurve me Covid, sipas të cilëve, pacientët qëndrojnë me orë të tëra në ambulanca duke marrë trajtim, ndërsa presin të lirohen vendet në spital.
Përballë denoncimeve, Kryeministri Edi Rama, në një status në rrjetin social, paralajmëron se duke vijuar nga nesër do të publikojë pamje ekskluzive nga spitalet COVID.
“Nesër në këtë faqe filmime krejt ekskluzive nga vija e zjarrit, në spitalet Covid ku sistemi ynë shëndetësor, më i gatshëm se asnjëherë më parë dhe heronjtë tanë me bluza të bardha, si asnjëherë më parë përballen me dallgët e forta të një epidemie globale, duke mbrojtur e shpëtuar jetë nga kthetrat e Armikut të Padukshëm…”, shkruan Rama.
Muaj më parë, nga stafet mjekësore u publikuan pamje të pacientëve në intubim, si një përgjigje ndaj hipotezave se koronavirusi nuk ekzistonte.
Ndërkohë Komiteti Teknik në një komunikim për mediat njoftoi edhe masat e reja sipas të cilit nga e mërkura do të vendosen orare të reja të lëvizjes.
Komiteti Teknik i Ekspertëve propozoi mbylljen e aktiviteteve të bareve dhe restoranteve dhe kufizimin e lëvizjeve pas orës 22:00 deri në 06:00 të mëngjesit.
Masa e propozuar nga Komiteti teknik, duket se është një paralajmërim për atë që mund të vijë në javët në vijim, ku nuk përjashtohet një tjetër mbyllje, e ngjashme me atë të muajve mars-prill-maj, edhe pse kjo nuk e zgjidh problemin.
Nga ekspertë të ndryshëm është hedhur idea e mbylljes së lokaleve dhe restoranteve, një masë e ngjashme si në Gjermani, por duket se Qeveria nuk ka fonde për të përballuar kostot e pagesave, bazuar në xhirot e deklaruara.
