Komiteti Teknik ndaj Covid ka njoftuar se duke nisur nga dita e mërkurë – 11 Nëntor – do të hyjnë në fuqi masa të reja me qëllim parandalimin e përhapjes së koronavirusit.
Zëvendësministrja e Shëndetësisë Mira Rakacolli, pjesë e komitetit, njoftoi se do të rikthehet kufizimi i lëvizjes në të gjithë vendin, nga ora 22:00 deri në ora 6:00. Përjashtim do të bëjnë lëvizjet për motive pune, emergjenca shëndetësore, apo “apo nevoja të domosdoshme”, deklaroi.
Rakacolli shtoi se baret dhe restorantet do të mbyllen në të gjithë vendin pas orës 22:00. Do funskionojnë vetëm “delivery”.
Ajo këshilloi “smart-working” për administratën, duke shtuar se përjashtim do të përbëjnë strukturat ofruese të shërbimeve që do të punojnë duke zbatuar protokollet e sigurisë.
Masat do të zgjasin për tre javë dhe do të rishikohen çdo javë në varësi të situatës dhe dinamikës së ngjarjeve, shtoi ajo.
Gjatë konferencës së komitetit u tha se vlera e R0 në vend ka shkuar në 1.3, si dhe u vu në dukje se maska nuk po mbahet nga të gjithë qytetarët.
Silva Bino nga ISHP deklaroi se së shpejti në vend do të futen edhe testimet e shpejta, për të cilat sqaroi se do të kryhen në çdo qendër shëndetësore apo spital në vend sipas një procedure të caktuar. Përgjigja e këtyre testeve, shtoi ajo, do të merret brenda 40 minutave.
/BN/
