Drejtoresha e Human Rights Watch për Europën, Lotte Leicht, ka reaguar lidhur me akuzat e Kryeministrit Edi Rama për rolin e kreut demokrat, Lulzim Basha në raportin e Dick Marty-t, i miratuar vite më parë në asamblenë e Këshillit të Evropës edhe nga votat e delegacionit shqiptar atje.
Lotte Leicht përmes Twitter-it shkruan se “përpjekjet e kryeministrit të Shqipërisë Edi Rama për të përdorur gjykatën e Kosovës si një armë kundër opozitës shqiptare janë të turpshme dhe të gabuara – një fyerje për viktimat”.
Në një postim të mëparshëm, që i drejtohet Kryeministrit Edi Rama, Leicht shkruan se “duhet tatë ndalojnë të shpifin për gjykatën e mbështetur nga BE dhe SHBA, si një sulm ndaj “drejtësisë së paprekshme të luftës çlirimtare”
Kjo gjykatë ka paditur individë për krime të pretenduara, jo një lëvizje, një grup të armatosur ose një kauzë. Pse po i mbron ata?”.
Në raportin e Marty-t flitej për ‘Shtëpinë e Verdhë’, ku thuhej se bëheshin transplante organesh.
Rama deklaroi se Beogradi nuk e donte atë raport, duke akuzuar kryedemokratin Basha se merrte në pyetje shqiptarët për llogari të Dick Marty.
Të dielën Rama dhe Basha shkëmbyen një seri akuzash në distancë lidhur me raportin.
“Lulëzim! Mos u fshih pas Covidit dhe lëri akuzat për ata që po luftojnë përditë në vijën e parë kundër virusit, po përgjigju për faktin që ke qenë bashkë me mjekun peruan në bërjen e dosjes për Shtëpinë e Verdhë!E thuaje cfarë mendon për votën e PD-LSI pro raportit të Dick Marty!”, shkruan Rama.
Kreu i PD dhe disa zyrtarë të tjerë të kësaj partie, por edhe aleates së saj, LSI-së, kanë reaguar lidhur me akuzat e Ramës, duke i cilësuar ato si shpifje, ndërsa Kryeministrin e cilësuan si Zëdhënës të Beogradit dhe që po i shërben Aleksandar Vuçiç, gjoja duke marrë në mbrojtje Hashim Thaçin.
