Ish-deputetja demokrate, Jorida Tabaku, ka publikuar një video nga ato që i quan si kantierët imagjinarë dhe 3D të Rilindjes. Tabaku shprehet se pamjet janë marrë sot në mëngjes në dy nga kantieret imagjinare të Rilindjes.
Në vijim ish-deputetja duke ironizuar ministrin e Rindërtimit, Arben Ahmetaj, Kryeministrin Edi Rama dhe Kryebashkiakun Erion Veliaj, shprehet se në këto projekte ndërtohen shtëpi imagjinare, rrugë dhe porte në 3D apo aeroporte, që duhet të kishin përfunduar vite më parë.
Por, sipas saj, sapo kamerat largohen nga kantieret imagjinare, gjithçka i rikthehet heshtjes dhe shesheve të premtimeve të pambajtura.
“Fakt mbetet që një vit pas termetit janë ndërtuar gjithsej 48 shtëpi nga 3389 te kontraktuara për rindërtim. Sikundër lagjet e reja apo aeroportet anë e mbanë Shqipërisë ekzistojnë vetëm në një folder special në USB-në e Arben Ahmetaj.
Premtimet e pambajtura dhe kjo qeveri janë binom i pandashëm. Sado të mundohen, videomontazhet nuk e fshehin dot dështimin dhe korrupsionin që ka shoqëruar në çdo hap procesin e rindërtimit”, shkruan Tabaku.
Në vijim ajo ripërsërit 4 pyetjet drejtuar Erion Veliajt lidhur me shembjen e gjimnazit “Sami Frashëri”, për të cilat thotë se kanë mbetur ende pa përgjigje.
Pyetjet drejtuar Veliajt
1. A u rehabilitua Sami Frasheri pak muaj para se të shembej ndonëse EV tha që do rrojë me vite?
2. Me cfarë fondesh po ndërtohet Sami Frashëri? Veliaj dhe Ahmetaj thanë me fonde të BE, ndërkohë që BE thotë që nuk po ndërton asnjë shkollë në Tiranë me fondet e saj.
3. A është shpallur në buletinin e datës 27 Mars projektimi i ndërtimit të shkollës Sami Frashëri dhe anulluar me datë 21 Prill? Që do të thotë se kur u prish me datë 24 Prill nuk kishte një projekt…
4. Në ç’sirtar ka përfunduar procedura e përfunduar e tenderit për shkollën Sami Frashëri? Pse nuk është bërë publike?
